१५ वर्षसम्म खानी ओगटेको भन्दै चौकुने गाउँपालिकाद्वारा मुक्तिश्रीसँगको सम्झौता रद्द गर्न पत्राचार

सुर्खेतको चौकुने गाउँपालिकाले डेढ दशकदेखि अनुमति पत्र लिएर पनि उद्योग सञ्चालन नगर्ने मुक्तिश्री प्रा.लि. सँगको सम्झौता रद्द गर्न माग गरेको छ। गाउँपालिकाले उद्योग, वाणिज्य तथा आपूर्ति मन्त्रालयलाई पत्र लेख्दै चौकुने सिमेन्ट उद्योगको वर्तमान ठेक्का खारेज गरी नयाँ प्रक्रियाबाट उद्योग सञ्चालनको पहल गरिदिन अनुरोध गरेको हो।

गाउँपालिकाका अध्यक्ष खड्क वि.क. (विवश) द्वारा मन्त्रालयलाई पठाइएको पत्रमा चौकुने गाउँपालिका वडा नं. ६ मा रहेको सो खानी मुक्तिश्री प्रा.लि. ले विगत १५ वर्षदेखि ओगटेर मात्र राखेको उल्लेख छ। “विगत डेढ दशकदेखि उद्योग सञ्चालन नगरी खानी ओगटेर मात्रै बसेको हुँदा उक्त ठेक्का रद्द गरी नयाँ ठेक्का प्रक्रियाबाट उद्योग सञ्चालन गरिदिनुहुन सिफारिसका साथ अनुरोध छ,” पत्रमा भनिएको छ।

उक्त पत्र प्राप्त भएपछि मन्त्रालयले समेत यस विषयलाई गम्भीरतापूर्वक लिँदै उद्योग विभाग र खानी तथा भूगर्भ विभागलाई आवश्यक कारबाहीका लागि निर्देशन दिइसकेको छ।

कर्णाली प्रदेशको विकासमा ठुलो योगदान पुर्‍याउने अपेक्षा गरिएको यो आयोजना लामो समयसम्म अलपत्र परेपछि स्थानीय सरकारले कडा कदम चालेको हो। यदि मन्त्रालयले नयाँ ठेक्का प्रक्रिया सुरु गरेमा यस क्षेत्रमा औद्योगिक गतिविधि बढ्ने र स्थानीयले रोजगारी पाउने अपेक्षा गरिएको छ।