अस्ट्रेलियामा कारको ठक्करबाट सुनसरीकी हिमालीको मृत्यु

सुनसरी — अस्ट्रेलियामा अनियन्त्रित कार घरभित्र पस्दा सुतिरहेकी एक नेपाली महिलाको ज्यान गएको छ। दुर्घटनामा सुनसरीकी विष्णुकुमारी गुरुङ (हिमाली) को मृत्यु भएको हो।

घटना शुक्रबार राति पश्चिमी अस्ट्रेलियाको पर्थस्थित रिभरभेल क्षेत्रमा भएको हो। छोरीको घरमा सुतिरहेकी ५३ वर्षीया गुरुङ घरभित्रै कार ठोक्किँदा घटनास्थलमै मृत्यु भएको प्रहरीले जनाएको छ।

परिवारका अनुसार उनी तीन दिनअघि मात्र नेपालबाट अस्ट्रेलिया पुगेकी थिइन्। सुनसरीको इनरुवा नगरपालिका–३, गुरुङ टोल स्थायी घर भएकी गुरुङ ‘हिमाली’ नामले समेत परिचित थिइन्।

प्रहरीका अनुसार पहेँलो रंगको फोर्ड फल्कन सेडान एलेक्जान्डर रोड हुँदै गइरहेको बेला नियन्त्रण गुमाएर राति करिब ११:४० बजे सडक छाड्दै युनिट (घर) भित्र ठोक्किएको थियो। दुर्घटनापछि आपतकालीन सेवाले तत्काल उद्धार प्रयास गरे पनि गुरुङको ज्यान बचाउन नसकिएको जनाइएको छ।

घटनाबारे थप अनुसन्धान भइरहेको अस्ट्रेलियाली प्रहरीले जनाएको छ।