सुर्खेतमा स्कुल बसको ठक्करबाट एक बालिकाको मृत्यु

सुर्खेतमा स्कुल बसको ठक्करबाट एक बालिकाको मृत्यु भएको छ । शुक्रबार बिहान करिब १०ः४५ बजेतिर वीरेन्द्रनगर नगरपालिका- १ को देउतीथान नजिकैको भित्री सडकमा कर्णाली प्रदेश ०२००१ क ००६८ नम्बरको स्कुल बसले ठक्कर दिँदा वीरेन्द्रनगर नगरपालिका – १ का सुरेश सुनारकी ३ वर्षीया छोरी समीक्षा सुनारको मृत्यु भएको जिल्ला ट्राफिक कार्यालय सुर्खेतले जानकारी दिएको छ ।

५५ वर्षका चालक बालकृष्ण गिरीले चलाएको श्री सनसाइन एकेडेमी बोर्डिङ स्कुलको बसले बालिकालाई ठक्कर दिँदा बालिकाको घटनास्थलमै मृत्यु भएको प्रहरीले जनाएको छ । अहिले चालक र गाडी प्रहरीको नियन्त्रणमा छन् । बालिकाको शव पोष्टमार्टमका लागि प्रदेश अस्पताल कालागाउँमा लगिएको छ । बांगेसिमलबाट देउतीथान तर्फ आउँदै गरेको बसले बालिकालाई ठक्कर दिएको हो ।