काठमाडौं । एसियन गेम्सअन्तर्गत क्रिकेट प्रतियोगितामा नेपालले आयोजक जापानलाई १५० रनको लक्ष्य दिएको छ।
वर्षाका कारण १५ ओभरमा छोट्याइएको खेलमा नेपालले निर्धारित ओभरमा चार विकेट गुमाएर १४९ रन बनायो। नेपालका लागि सन्दीप जोराले ३२ बलमा पाँच चौका र तीन छक्कासहित अविजित ५७ रन बनाए।
लोकेश बमले आक्रामक ब्याटिङ गर्दै २२ बलमा ६ छक्का र एक चौकासहित ५२ रन बनाए। उनले खेलको अन्तिम बलमा अर्धशतक पूरा गरेका हुन्।
काठमाडौं– लगातार वर्षाका कारण क्वार्टरफाइनल खेल रद्द भएपछि नेपाल २०औँ एसियाली खेलकुदको क्रिकेट प्रतियोगिताबाट बाहिरिएको छ। मंगलबार नागोयास्थित कोरोगी स्पोर्टस पार्कमा श्रीलंकासँग हुने तय भएको खेल टससमेत नभई रद्द भएपछि नेपाल प्रतियोगिताबाट बाहिरिएको हो। खेल हुन नसकेको अवस्थामा ट्वान्टी–२० वरीयतामा माथि रहेको टोलीलाई विजेता मान्ने नियमअनुसार श्रीलंका सेमिफाइनलमा पुगेको छ। ट्वान्टी–२० विश्व वरीयतामा श्रीलंका नवौँ र नेपाल १४औँ स्थानमा छन्। नागोयामा शनिबारदेखि निरन्तर वर्षा भइरहेको छ। वर्षाकै कारण नेपाल र जापानबीचको समूहचरणको खेल पनि पूरा हुन सकेको थिएन। नेपालले प्रतियोगिताको पहिलो खेलमा अफगानिस्तानलाई पाँच विकेटले हराएको थियो भने जापानविरुद्धको खेल वर्षाका कारण १५ ओभरमा छोट्याइएको थियो। उक्त खेलमा नेपालले चार विकेट गुमाएर १४९ रन बनाए पनि त्यसपछि वर्षा भएपछि जापानले ब्याटिङ गर्न पाएन।
दशौं राष्ट्रिय खेलकुद प्रतियोगिताको तयारीस्वरूप कर्णाली प्रदेशमा जिल्ला तथा प्रदेशस्तरीय छनोट प्रतियोगिताको मिति र स्थान तय गरिएको छ। कर्णाली प्रदेश खेलकुद विकास परिषद्का अनुसार जिल्लास्तरीय छनोट असोज १२ देखि २२ गतेसम्म १० वटै जिल्लामा सञ्चालन हुनेछ भने यसको व्यवस्थापनका लागि पाँच जना संयोजक तोकिएका छन्। जिल्ला छनोट पश्चात् प्रदेशस्तरीय छनोट प्रतियोगिता असोज २६ देखि ३१ गतेसम्म सञ्चालन हुनेछ। प्रदेशस्तरीय छनोट अन्तर्गत दैलेखमा कराँते, एफसी कराँते र ह्यान्डबल, जाजरकोटमा खोखो, सल्यानमा टेबल टेनिस, रुकुम पश्चिममा महिला कबड्डी, जुम्लामा डब्लूटीएफ तेक्वान्दो, हुम्लामा महिला भलिबल र हक्की, मुगुमा पुरुष कबड्डी, कालिकोटमा पुरुष भलिबल, डोल्पामा चेस तथा बाँकी अन्य खेलहरूको छनोट सुर्खेतमा हुनेछ। राष्ट्रिय खेलकुद परिषद् (राखेप) को १२५औँ बोर्ड बैठकले यसअघि मिति परिवर्तन गर्दै दशौं राष्ट्रिय खेलकुद प्रतियोगिता आगामी मंसिर १६ देखि २९ गतेसम्म कर्णाली प्रदेशमै आयोजना गर्ने निर्णय गरेको छ।
काठमाडौँ । जापानमा जारी २०औँ एसियाली खेलकुदमा नेपाली राष्ट्रिय महिला भलिबल टोलीले लगातार दोस्रो हार व्यहोरेको छ। बिहीबार भएको खेलमा नेपाल इन्डोनेसियासँग ३–० को सोझो सेटमा पराजित भएको हो। आइचीस्थित पार्क एरिना कोमाकीमा भएको खेलमा नेपालले पहिलो सेट २५–१२, दोस्रो सेट २५–२१ र तेस्रो सेट २५–२० ले गुमायो। यसअघि बुधबार भएको पहिलो खेलमा नेपाल जापानसँग पनि ३–० को सोझो सेटमा पराजित भएको थियो। लगातार दोस्रो हारसँगै महिला भलिबलमा नेपालको पदक जित्ने सम्भावना समाप्त भएको छ। अब नेपालले वरियताका लागि प्रतिस्पर्धा गर्नेछ। त्यसका लागि नेपालले सामना गर्ने टोलीको टुङ्गो लाग्न बाँकी छ। नेपालले सन् २०२३ मा चीनको हाङ्झाउमा सम्पन्न १९औँ एसियाली खेलकुदमा ११औँ स्थान हासिल गरेको थियो।