सुर्खेत। सुर्खेतको चौकुने गाउँपालिका–५ रेक्चामा घरेलु विवादका क्रममा श्रीमतीको हत्या गरेको आरोपमा प्रहरीले एक पुरुषलाई पक्राउ गरेको छ।

प्रहरीका अनुसार ३२ वर्षीय गोपीराम जैसीले सोमबार बिहान करिब १०ः२० बजे घरभित्रै ३० वर्षीया श्रीमती चन्द्रा देवकोटालाई फरुवाले टाउकोमा प्रहार गरेका थिए। गम्भीर घाइते भएकी चन्द्राको घटनास्थलमै मृत्यु भएको प्रहरीले जनाएको छ।

घटनाबारे जानकारी पाएपछि प्रहरी चौकी विजौराबाट प्रहरी सहायक निरीक्षक बुद्धी साउँदको नेतृत्वमा टोली तथा इलाका प्रहरी कार्यालय बाबियाचौरबाट प्रहरी निरीक्षक भुपेन्द्र शाहीको नेतृत्वमा प्रमाण संकलनसहितको टोली घटनास्थल पुगेको थियो। स्थानीयवासीको सहयोगमा आरोपित गोपीरामलाई नियन्त्रणमा लिइएको प्रहरीले जनाएको छ।

प्रहरीले घटनास्थल सुरक्षित राखेर प्रारम्भिक अनुसन्धान तथा शव परीक्षणलगायतको प्रक्रिया अघि बढाएको छ। घटनाको थप अनुसन्धान भइरहेको प्रहरीले जनाएको छ।