भोजपुरको पौवादुङ्मा गाउँपालिका-३, च्याङ्ग्रेमा सामान्य विवादले उग्र रूप लिँदा एक जना गम्भीर घाइते भएका छन्। बुधबार राति स्थानीय ६० वर्षीय गणेशबहादुर राईले २७ वर्षीय धनकुमार राईमाथि खुकुरी प्रहार गरेका हुन्। खुकुरी प्रहारबाट गम्भीर घाइते भएका धनकुमारको घाँटीको पछाडिको भागमा गहिरो चोट लागेको छ भने थप उपचारका लागि उनलाई धरान पठाइएको छ। घटनाको जानकारी पाउनासाथ सक्रिय भएको प्रहरीले खुकुरीसहित आरोपित ६० वर्षीय गणेशबहादुरलाई नियन्त्रणमा लिएको छ। अहिले यस घटनाका विषयमा थप अनुसन्धान भइरहेको जिल्ला प्रहरी कार्यालयले जनाएको छ। सामान्य भनाभनबाट सुरु भएको विवादले हिंसात्मक मोड लिँदा स्थानीयवासी त्रसित बनेका छन्।