मकवानपुरको इन्द्रसरोवर गाउँपालिका–२ स्थित कुलेखानी ड्यामनजिक सिमखोलाको बाढीमा परी बेपत्ता भएका स्कुटर चालक मृत अवस्थामा फेला परेका छन्। गत असार २९ गते दिउँसो अविरल वर्षासँगै आएको आकस्मिक बाढीले सर्लाहीका महेशकुमार कार्कीलाई स्कुटरसहित बगाएको थियो। घटनाको दुई दिनपछि बिहीबार बिहान नेपाली सेना, सशस्त्र प्रहरी र नेपाल प्रहरीको संयुक्त खोजी टोलीले घटनास्थलबाट करिब दुई सय मिटर तल खोलाको बगरमा बालुवा र लेदोले पुरिएको अवस्थामा कार्कीको शव फेला पारेको हो। यसअघि मंगलबार नै बागमती प्रदेश ०२–०३२ प ८०५४ नम्बरको उनको स्कुटर क्षतविक्षत अवस्थामा फेला परेको थियो। खराब मौसम र खोलाको तीव्र बहावका बावजुद सुरक्षाकर्मीले अथक प्रयास गरी शव फेला पारेका हुन्। मृतक कार्कीका आफन्तले घटनास्थलमै शवको सनाखत गरेका छन् भने प्रहरीले आवश्यक कानूनी प्रक्रिया पूरा गरी पोस्टमार्टमका लागि शव अस्पताल पठाएको छ।