बैतडीको पुर्चौडी नगरपालिकामा बिहीबार दिउँसो भएको दुखद ट्र्याक्टर दुर्घटनामा एक जनाको घटनास्थलमै ज्यान गएको छ। पुर्चौडी नगरपालिका–१ रोतेशिला क्षेत्रमा पुरघाटबाट ढोल्यामोडतर्फ जाँदै गरेको सु.प.प्र. ०२–००१ त १६०० नम्बरको ट्र्याक्टर दिउँसो करिब ३:३० बजेको समयमा सडकबाट २० देखि २५ मिटर तल खसेको हो। यस दुर्घटनामा परेर ट्र्याक्टर चालक कञ्चनपुरको भीमदत्त नगरपालिका निवासी ४४ वर्षीय देवसिंह भण्डारीको घटनास्थलमै मृत्यु भएको जिल्ला प्रहरी कार्यालय बैतडीले जनाएको छ। प्रहरीका अनुसार दुर्घटनाको समयमा ट्र्याक्टरमा चालकबाहेक अन्य कोही पनि सवार थिएनन्। प्रहरी निरीक्षक भुवन तिमल्सिनाका अनुसार हालसम्म दुर्घटनाको यकिन कारण खुल्न सकेको छैन र घटनाबारे थप अनुसन्धान भइरहेको छ।