ताप्लेजुङस्थित सुकेटार विमानस्थलमा झन्डै चार महिनाको अन्तरालपछि हवाई उडान पुन: सुचारु भएको छ। यसअघि गत जेठ २२ गते यस विमानस्थलमा अन्तिम पटक उडान भएको थियो। नजिकिँदै गरेको दसैँ र तिहारजस्ता चाडपर्वलाई मध्यनजर गर्दै उडान सेवा पुनः सञ्चालनमा ल्याइएको विमानस्थलका कर्मचारीले बताएका छन्। नेपाल वायुसेवा निगमको ट्विनअटर जहाजले सोमबार उडान भरेको हो। निगमका ताप्लेजुङस्थित स्टेसन इन्चार्ज नारायणकुमार कार्कीका अनुसार काठमाडौँबाट १३ जना यात्रु लिएर आएको उक्त जहाज ताप्लेजुङबाट ५ जना यात्रु बोकेर काठमाडौँ फर्किएको छ। विमानस्थलको उडान तालिका अनुसार हाल सेप्टेम्बर महिनासम्मका लागि साताको एकदिन (सोमबार) मात्र उडान हुनेछ। तर, आगामी अक्टोबर महिनादेखि भने सातामा तीन दिन उडान हुनेगरी नयाँ तालिका निर्धारण गरिएको छ। अक्टोबरदेखि प्रत्येक साताको सोमबार, बिहीबार र शनिबार उडान सञ्चालन हुनेछ। त्यस्तै, नेपाल वायुसेवा निगमले उडानका लागि हवाई भाडा दरसमेत सार्वजनिक गरेको छ। निगमका अनुसार काठमाडौँदेखि ताप्लेजुङसम्मको यात्राका लागि प्रतिव्यक्ति भाडा १२ हजार २ सय ७० रुपियाँ र ताप्लेजुङदेखि काठमाडौंका लागि १२ हजार ७० रुपियाँ कायम गरिएको छ।