मौसम पूर्वानुमान महाशाखाले बिहीबारदेखि चार दिनसम्म वर्षा हुने अनुमान सार्वजनिक गरेपछि काठमाडौँ उपत्यकामा पूर्वसचेतना अपनाउन थालिएको छ। महाशाखाले कोशी, बागमती, गण्डकी र लुम्बिनी प्रदेशका पहाडी जिल्लामा सतर्क रहन आग्रह गरेको छ।

वर्षासँगै उपत्यकाका नदी करिडोरमा पानीको बहाव बढ्न सक्ने आकलन गर्दै ट्राफिक प्रहरीले करिडोर क्षेत्रमा पार्किङ गर्न रोक लगाएको छ। उपत्यका ट्राफिक प्रहरी कार्यालयका एसपी नरेश सुवेदीले दिएको जानकारीअनुसार काठमाडौँ, भक्तपुर र ललितपुरका जोखिमयुक्त करिडोर क्षेत्रमा पार्किङ निषेध गरिएको छ।

बागमती नदी, विष्णुमती, धोबीखोला र हनुमन्ते खोला करिडोरमा जोखिम अवधिभर कुनै पनि सवारीसाधन रोक्न र पार्किङ गर्न पाइने छैन। साथै, करिडोर क्षेत्रमा सञ्चालित वर्कसपहरूमा पनि सवारीसाधन नराख्न माइकिङ गरेर जानकारी गराइएको एसपी सुवेदीले बताएका छन्।

मौसम पूर्वानुमान महाशाखाका अनुसार बङ्गालको खाडीमा बनेको गहिरो न्यूनचापीय प्रणाली आगामी २४ घण्टापछि कमजोर बन्न सक्ने सम्भावना रहेको छ।