लोकप्रिय भिडियो प्लेटफर्म टिकटकले सन् २०२६ को पहिलो तीन महिनामा मात्र नेपालबाट अपलोड गरिएका १९ लाख ६१ हजारभन्दा बढी भिडियोहरू हटाएको छ। कम्पनीको पछिल्लो कम्युनिटी गाइडलाइन्स इन्फोर्समेन्ट रिपोर्टअनुसार, टिकटकको आचारसंहिता उल्लंघन गरेको पाइएपछि ती सामग्रीहरू हटाइएको हो। यो संख्या नेपालबाट सो अवधिमा अपलोड भएका कुल भिडियोहरूको करिब ०.४ प्रतिशत हो। टिकटकले आफूलाई सुरक्षित र मर्यादित प्लेटफर्म बनाउन प्रविधि र जनशक्ति प्रयोग गरेर यस्ता सामग्रीमाथि कडाइ गर्दै आएको छ। विशेष गरी ८६.५ प्रतिशत भिडियोहरू पोस्ट भएको २४ घण्टाभित्रै हटाउन सफल हुनुले कम्पनीको स्वचालित प्रणाली र सक्रिय निगरानी कति प्रभावकारी छ भन्ने प्रस्ट पार्छ। यद्यपि, झुक्किएर वा प्रक्रियागत त्रुटिका कारण हटाइएका ६१ हजारभन्दा बढी भिडियोहरू समीक्षापछि पुनःस्थापना पनि गरिएको छ। विश्वव्यापी रूपमा टिकटकले यसै अवधिमा १८ करोड ४० लाखभन्दा बढी सामग्रीहरू हटाउनुका साथै साढे ८ करोडभन्दा बढी नक्कली एकाउन्ट र १३ वर्षमुनिका बालबालिकाका शङ्कास्पद एकाउन्टहरूमाथि समेत कडा कारबाही गरेको छ। प्लेटफर्ममा पारदर्शिता बढाउने र प्रयोगकर्ताको सुरक्षा सुनिश्चित गर्ने उद्देश्यले टिकटकले यस्ता प्रतिवेदनहरू नियमित रूपमा सार्वजनिक गर्दै आएको छ।