सुर्खेत, १५ असोज । रसुवाको भोटेकोसी नदीमा आएको विनाशकारी बाढीबाट प्रभावित नागरिकको खोज, उद्धार तथा पुनर्निर्माणमा सहयोग पु¥याउन सुर्खेतका युवा व्यवसायी दीपककुमार बुढाक्षेत्री र हिमा कुमारी उपाध्यायले ११ लाख ११ हजार १११ रुपैयाँ सहयोग गरेका छन्।
विसी ग्रुप कर्णालीका अध्यक्ष बुढाक्षेत्री र ग्रुपकी निर्देशक उपाध्यायले बिहीबार अर्थ मन्त्रालयमा आयोजित कार्यक्रममा अर्थमन्त्री स्वर्णिम वाग्लेलाई उक्त रकम प्रधानमन्त्री दैवी प्रकोप उद्धार कोषमा हस्तान्तरण गरेका हुन्। चेक हस्तान्तरण कार्यक्रममा सुर्खेतबाट निर्वाचित प्रतिनिधिसभा सदस्य रमेश सापकोटाको समेत उपस्थिति थियो।
स्वर्गीय बुवा मानबहादुर बुढाको नवौँ पुण्यतिथि तथा विसी ग्रुपद्वारा सञ्चालित भवानी छापाखानाको २७औँ वार्षिकोत्सवको अवसर पारेर बुढा दम्पतीले बाढी प्रभावितलाई सहयोग गरेका हुन्। ठूलो जनधनको क्षति भएको अवस्थामा आफू र आफ्नो व्यवसायको तर्फबाट सामाजिक दायित्व पूरा गर्ने उद्देश्यले सहयोग गरिएको उनीहरूले बताएका छन्।
सहयोग रकममा हिमा उपाध्यायले विभिन्न सरकारी निकायबाट प्राप्त पुरस्कार तथा सम्मानबापत पाएको रकमसमेत समावेश गरिएको छ। उनले राष्ट्रिय युवा प्रतिभा सम्मान–२०७८, राष्ट्रपति महिला उद्यमी समुन्नती पुरस्कार–२०८० र कर्णाली प्रदेश सरकारको उत्कृष्ट महिला उद्यमी सम्मान–२०८२ बाट प्राप्त एक–एक लाख रुपैयाँ राहत कोषमा प्रदान गरेकी छन्। बाँकी रकम विसी ग्रुपअन्तर्गतका विभिन्न व्यवसायिक संस्थाबाट जुटाइएको हो। भवानी छापाखानाबाट तीन लाख ११ हजार १०१ रुपैयाँ तथा गंगामाला ट्राभल्स एण्ड टुर्स, युगआह्वान राष्ट्रिय दैनिक÷अल्फा कम्युनिकेशन कर्नर एण्ड विज्ञापन एजेन्सी, रारा प्रिन्टिङ प्रेस प्रालि कोहलपुर र एस मल्टिबिजनेस प्रालि काठमाडौंबाट एक–एक लाख रुपैयाँ सहयोग गरिएको जनाइएको छ।
राहत रकम हस्तान्तरणका क्रममा बुढाक्षेत्रीले अर्थमन्त्री वाग्लेसमक्ष कर्णाली र लुम्बिनी प्रदेशसँग सम्बन्धित विभिन्न विकास तथा आर्थिक विषयसमेत उठाएका छन्। उनले औद्योगिक क्षेत्रका उद्योग तथा प्रतिष्ठानलाई परियोजनाका आधारमा बैंक ऋण उपलब्ध गराउने स्पष्ट कार्यविधि ल्याउन माग गरेका छन्। बजेटमा व्यवस्था भए पनि कार्यान्वयनका लागि स्पष्ट प्रक्रिया नहुँदा निजी क्षेत्रको लगानीमा अन्योल सिर्जना भएको उनको भनाइ छ।
उनले महिला उद्यमशीलता विकास कोषबाट प्रदान गरिने कर्जाको सीमा एक करोड रुपैयाँ पु¥याउनुपर्ने, प्रदेशगत रूपमा लगानीको सन्तुलन कायम गर्नुपर्ने तथा स्थानीय तहमा घोषणा गरिएका औद्योगिक ग्रामलाई निजी क्षेत्रको साझेदारीमा सञ्चालन गर्न आवश्यक कार्यविधि ल्याउनुपर्ने मागसमेत राखेका छन्। बाँकेको लवस्ता÷बैजनाथमा घोषणा गरिएको औद्योगिक क्षेत्र लामो समयदेखि सञ्चालनमा आउन नसकेको भन्दै तत्काल सञ्चालनमा ल्याउन पनि उनले आग्रह गरेका छन्।
बुढाक्षेत्रीले सुर्खेत विमानस्थलको विस्तार तथा सुधारलाई प्राथमिकतामा राख्दै कर्णालीका १० जिल्ला तथा सुदूरपश्चिमका पहाडी र हिमाली जिल्लामा हुने हवाई उडान सुर्खेतबाट केन्द्रित गरी नियमित गर्नुपर्ने माग गरेका छन्। कर्णालीका रैथाने बाली कोदो, फापर, चिनो, कागुनो र मार्सीधान तथा बहुमूल्य जडीबुटीको व्यावसायिक उत्पादन विस्तारका लागि सरकारले विशेष नीति ल्याउनुपर्ने उनको भनाइ छ।
त्यस्तै, उद्यमी, कम्पनी, किसान समूह र सहकारीलाई जोडेर जग्गा एकीकरणमार्फत व्यावसायिक खेती विस्तार गर्न सकिने उनले बताएका छन्। जाजरकोटमा पाइने काइनाटिक तथा स्लेट ढुंगाको चोरी निकासी रोक्दै प्रशोधन उद्योग स्थापना गर्नुपर्ने, सुर्खेत–कोहलपुर–नेपालगञ्ज सडक खण्डलाई चार लेनमा विस्तार गर्नुपर्ने तथा रारा र शे–फोक्सुण्डोजस्ता पर्यटकीय गन्तव्यसम्मको पहुँच मार्ग सुधार गर्नुपर्ने मागसमेत उनले राखेका छन्। दैलेखमा पेट्रोलियम पदार्थ उत्खनन, प्रशोधन तथा बिक्री–वितरणका लागि आवश्यक सडक पूर्वाधार निर्माणलाई पनि प्राथमिकता दिनुपर्ने भन्दै उनले अर्थमन्त्रीको ध्यानाकर्षण गराएका छन्।
बुढाक्षेत्रीको व्यवसायिक यात्रा पनि संघर्षपूर्ण रहेको छ। आर्थिक अभावका कारण कक्षा ८ मा अध्ययन गर्दा विद्यालयको मासिक शुल्कसमेत तिर्न नसकेको उनले बताएका छन्। शुल्क तिर्न नसकेपछि कक्षा तेस्रो स्थानमा उत्तीर्ण हुँदा पनि उनको नतिजा प्रकाशित नभएको र पछि विभिन्न संस्था तथा व्यक्तिको सहयोगबाट शुल्क र शैक्षिक सामग्री प्राप्त भएपछि अध्ययनलाई निरन्तरता दिएको उनले बताएका छन्।
बाल्यकालमै बाल क्लबमार्फत सामाजिक गतिविधिमा सक्रिय भएका बुढाक्षेत्रीले भित्ते पत्रिकाबाट पत्रकारिताको यात्रा सुरु गरेका थिए। बाल क्लबका गतिविधिबारे रेडियो तथा पत्रपत्रिकामा समाचार र फोटो पठाउने क्रममा पत्रकारिताप्रति रुचि बढेको उनले बताएका छन्। एसएलसीपछि विभिन्न काम गर्दै उनले लोकमञ्च दैनिकमा मासिक एक हजार पाँच सय रुपैयाँ पारिश्रमिक पाउने गरी रिपोर्टरका रूपमा पत्रकारिता सुरु गरेका थिए।
वि.सं. २०६७ सालदेखि युगआह्वान दैनिकसँग जोडिएका बुढाक्षेत्री हाल उक्त पत्रिकाका प्रकाशक तथा सम्पादक छन्। पत्रकारिता क्षेत्रमा करिब २० वर्षको अनुभव हासिल गरेका उनले आफ्नो संस्थामार्फत हकरदेखि डेस्क सम्पादकसम्म करिब २५ जनालाई रोजगारी दिएका छन्। व्यवसायका अन्य क्षेत्रसमेत जोड्दा ५५ जनाभन्दा बढी युवालाई रोजगारी दिएको र विभिन्न व्यवसायमार्फत वार्षिक करिब २५ करोड रुपैयाँको कारोबार गर्दै आएको विवरण उनले दिएका छन्।
बुढाक्षेत्रीले पत्रकारिता र सञ्चारसँगै ट्राभल्स एण्ड टुर्स, छापाखाना, विज्ञापन, ऊर्जा तथा अन्य क्षेत्रमा व्यवसाय विस्तार गरेका छन्। परिवारका सदस्यलाई समेत व्यवसायमा जोडेर सामाजिक सेवाका लागि विसी ग्रुप फाउण्डेशन सञ्चालनमा ल्याइएको छ। जाजरकोट भूकम्पका बेला जुनिचाँदे गाउँपालिका–१ स्थित सरस्वती प्राथमिक विद्यालयका एक सय १५ भन्दा बढी विद्यार्थीलाई करिब दुई लाख रुपैयाँ बराबरको न्यानो कपडा तथा शैक्षिक सामग्री वितरण गरिएको उनले बताएका छन्।
आगामी दिनमा कर्णाली प्रदेशको सञ्चार उद्यमलाई थप व्यवस्थित तथा डिजिटल बनाउने, पर्यटन क्षेत्रमा लगानी बढाउने, कर्णालीमा उपलब्ध कच्चा पदार्थमा आधारित उद्योग सञ्चालन गर्ने तथा वैकल्पिक ऊर्जा र जलविद्युतका क्षेत्रमा लगानी गर्ने योजना बुढाक्षेत्रीले अघि सारेका छन्। विभिन्न क्षेत्रमा लगानी विस्तार गर्दै करिब एक हजार व्यक्तिलाई प्रत्यक्ष रोजगारी दिने र वार्षिक एक अर्ब रुपैयाँभन्दा बढीको व्यवसायिक कारोबार गर्ने उनको दीर्घकालीन योजना छ। विसी ग्रुप फाउण्डेशनलाई संस्थागत रूपमा विस्तार गर्दै आम्दानीको केही हिस्सा सामाजिक सेवामा खर्च गर्ने योजना पनि उनले सुनाएका छन्।
