गौरव महिनाको अवसरमा कर्णालीमा नीति संवाद, सामाजिक विकास मन्त्रीलाई ज्ञापनपत्र बुझाइयो

सुर्खेत।  गौरव महिना (Pride Month) को अवसरमा कर्णाली प्रदेशको वीरेन्द्रनगर, सुर्खेतमा यौनिक तथा लैङ्गिक अल्पसंख्यक समुदायको अधिकार, सम्मान, पहिचान र समावेशिताका विषयमा प्रदेशस्तरीय नीति संवाद कार्यक्रम सम्पन्न भएको छ।

कार्यक्रममा प्रदेश सरकार, नागरिक समाज, विकास साझेदार संस्था तथा समुदायका प्रतिनिधिहरूको सहभागिता रहेको थियो। सहभागीहरूले शिक्षा, स्वास्थ्य, रोजगारी, सामाजिक सुरक्षा तथा सार्वजनिक सेवामा समान पहुँच सुनिश्चित गर्न समावेशी नीति तथा कार्यक्रम आवश्यक रहेकोमा जोड दिएका थिए।

कार्यक्रमका प्रमुख अतिथि सामाजिक विकास मन्त्री घनश्याम भण्डारीले प्रदेश सरकारले सबै नागरिकको समान अधिकार सुनिश्चित गर्न समुदायमैत्री नीति तथा कार्यक्रमलाई प्राथमिकता दिने प्रतिबद्धता व्यक्त गर्नुभयो।

कार्यक्रमको निष्कर्षस्वरूप सादा नेपाल, कर्णाली इन्द्रेणी आवाज, सीसीआर–कर्णाली, बालबालिका शान्ति क्षेत्र राष्ट्रिय अभियान तथा यौनिक तथा लैङ्गिक अल्पसंख्यकहरूको महासंघ नेपालको संयुक्त पहलमा सामाजिक विकास मन्त्री घनश्याम भण्डारीलाई ज्ञापनपत्र बुझाइएको थियो। ज्ञापनपत्रमार्फत यौनिक तथा लैङ्गिक अल्पसंख्यक समुदायका सवालहरूलाई प्रदेश सरकारको नीति, योजना, बजेट तथा कार्यक्रममा समावेश गरी समुदायमैत्री वातावरण निर्माण गर्न आग्रह गरिएको आयोजकले जनाएको छ।

सहभागीहरूले सम्मान, समान अवसर र मानव अधिकारको सुनिश्चिततामार्फत समावेशी समाज निर्माणमा सबै पक्षको सहकार्य आवश्यक रहेको  बताए।