चौकुने गाउँपालिका वडा नं. ४ बिजौरामा दिगो वन ,समृद्ध जीवन नारासहित योजना तर्जुमा गोष्ठी सम्पन्न

सुर्खेत।  “दिगो वन–समृद्ध जीवन, बनलाई डढेलोबाट बचाऔं, बन अतिक्रमणबाट बचाऔं” भन्ने मूल नाराका साथ सब डिभिजन वन कार्यालय स्तरीय योजना तर्जुमा गोष्ठी सम्पन्न भएको छ। सुर्खेतको चौकुने गाउँपालिका वडा नं. ४ बिजौरामा आयोजित उक्त गोष्ठी बेतान कर्णाली सब डिभिजन वन कार्यालय बिजौरा, सुर्खेतको आयोजनामा सम्पन्न भएको हो। कार्यक्रममा वडा नं. ४ का वडा अध्यक्ष टोपबहादुर बुढाक्षेत्री प्रमुख अतिथिको रूपमा उपस्थित रहनुभएको थियो भने डिभिजन वन कार्यालय भेरी बाबियाचौरका वन अधिकृत धनञ्जय कडेलको अध्यक्षतामा कार्यक्रम सम्पन्न भएको थियो।

गोष्ठीमा स्थानीय सरोकारवाला, सामुदायिक वन उपभोक्ता समूहका अध्यक्ष तथा सम्बन्धित निकायका पदाधिकारीहरूको उल्लेख्य सहभागिता रहेको थियो। कार्यक्रममा वन संरक्षण, व्यवस्थापन तथा दिगो उपयोगका विषयमा व्यापक छलफल गरिएको थियो।

कार्यक्रमका सभा-अध्यक्ष तथा वन अधिकृत धनञ्जय कडेलले वन संरक्षणमा सबै पक्षको सहकार्य अपरिहार्य रहेको बताउनुभयो। उहाँले वनमा हुने डढेलो नियन्त्रण, अवैध कटानी तथा अतिक्रमण रोक्न स्थानीय समुदायको सक्रिय भूमिका आवश्यक रहेको उल्लेख गर्नुभयो।

साथै, वनको दीगो व्यवस्थापनबाट मात्रै पर्यावरणीय सन्तुलन कायम राख्दै स्थानीयको जीवनस्तर उकास्न सकिने उहाँको भनाइ थियो। कार्यक्रममा वन क्षेत्रको दिगो उपयोग, जैविक विविधताको संरक्षण तथा समुदायको आयआर्जन वृद्धि गर्ने योजनाहरु तर्जुमा गरिएको जनाइएको छ। कार्यक्रमको सञ्चालन मोहन सिंह बुढाले गर्नुभएको थियो।