जाडोयाममा हाडजोर्नीको समस्या किन बढ्छ?

चिकित्सक डा. विनोद शेरचनका अनुसार चिसोकै कारणले हाडजोर्नीको रोग सुरु हुने होइन, तर पहिलेदेखि समस्या भएकाहरूमा जाडोयाममा दुखाइ भने बढ्ने गर्छ। “गर्मीको तुलनामा जाडोमा हाडजोर्नी दुखाइका कारण अस्पताल आउने वृद्ध बिरामीको संख्या करिब ५० प्रतिशतसम्म बढेको देखिन्छ,” उनले बताए।

किन बढ्छ दुखाइ?

डा. शेरचनका अनुसार जाडोयाममा दुखाइ बढ्नुका प्रमुख कारणहरू यस्ता छन्–

• स्नायुहरूको संवेदनशीलता बढ्नु : चिसोका कारण दुखाइ महसुस गर्ने स्नायुहरू बढी सक्रिय हुने हुँदा पीडा बढ्छ।

• वायुमण्डलीय दबाव कम हुनु : जाडोमा वायुमण्डलीय दबाव घट्दा जोर्नी र मांसपेशीमा सजिलै सुजन आउन सक्छ, जसले दुखाइ बढाउँछ।

• मांसपेशीमा ऐठन : चिसो मौसममा मांसपेशी कडा हुने र ऐठन बढी हुने हुँदा पीडा बढ्ने गर्छ।

• रक्तसञ्चारमा कमी : हातगोडामा तुलनात्मक रूपमा रक्तसञ्चार कम हुँदा दुखाइ तीव्र हुन्छ।

• भिटामिन–डीको कमी : जाडोमा दिन छोटो र रात लामो हुने भएकाले घाम कम लाग्छ, जसले शरीरमा भिटामिन–डीको मात्रा घटाएर हाडजोर्नी कमजोर बनाउँछ।

कसरी बच्ने?

हाडजोर्नीको दुखाइ कम गर्न र समस्या नियन्त्रणमा राख्न केही सामान्य सावधानी अपनाउन चिकित्सकको सुझाव छ–

• शरीर न्यानो राख्ने कपडा लगाउने

• तातो तथा झोलिलो खाना प्रशस्त खाने

• नियमित हल्का व्यायाम र शारीरिक गतिविधि गर्ने

• पारिलो घाममा बस्ने

• भिटामिन–डी र पोषणयुक्त खाना सेवन गर्ने

यी उपाय अपनाउँदा पनि दुखाइ कम नभएमा चिकित्सकको सल्लाहअनुसार औषधि सेवन गर्नुपर्ने डा. शेरचनले सुझाएका छन्।

विशेषज्ञहरूका अनुसार जाडोयाममा सचेत रहँदा हाडजोर्नीको समस्या धेरै हदसम्म नियन्त्रणमा राख्न सकिन्छ।