निर्वाचन आयोगद्वारा चुनावी प्रचारमा बालबालिकाको प्रयोग नगर्न निर्देशन

काठमाडौँ। निर्वाचन आयोग ले आगामी चुनावी अभियानमा बालबालिकाको प्रयोग नगर्न सबै राजनीतिक दल र उम्मेदवारलाई निर्देशन दिएको छ।

आयोगका प्रवक्ता नारायणप्रसाद भट्टराईले सोमबार (फागुन ११) जारी गरेको विज्ञप्तिमार्फत बालबालिकालाई चुनाव प्रचार, आमसभा तथा जुलुसमा संलग्न नगराउन आग्रह गरेका हुन्।

निर्वाचन आचारसंहिताको दफा १३, उपदफा (१), खण्ड (ट) अनुसार चुनावी प्रचारप्रसारका गतिविधिमा बालबालिकालाई प्रयोग गर्नु वा गराउनु निषेध गरिएको आयोगले स्मरण गराएको छ।

आचारसंहिता उल्लंघन गरेमा जरिवाना निर्धारण गर्नेदेखि उम्मेदवारी रद्दसम्मको कारबाही हुन सक्ने कानुनी व्यवस्था रहेको आयोगले चेतावनी दिएको छ।