धादिङमा बस दुर्घटना: १७ जनाको मृत्यु, २४ घाइते

काठमाडौँ। पोखराबाट काठमाडौँतर्फ आउँदै गरेको यात्रुवाहक बस धादिङमा दुर्घटना हुँदा १७ जनाको मृत्यु भएको छ भने २४ जना घाइते भएका छन्।

जिल्ला प्रहरीका अनुसार ग १ ख १४२१ नम्बरको बस आज बिहान करिब १:३० बजे धादिङ को बेनिघाट रोराङ गाउँपालिका–५ भैँसीगौडास्थित पृथ्वी लोकमार्ग बाट तल खस्दै त्रिशूली नदी मा खसेको हो।

सशस्त्र प्रहरी बल नेपाल का प्रवक्ता विष्णुप्रसाद भट्टका अनुसार हालसम्म १७ जनाको शव निकालिएको छ। घाइते २४ जनालाई उद्धार गरी नजिकका विभिन्न अस्पतालमा उपचारका लागि पठाइएको उनले जानकारी दिए।

मृतक तथा घाइतेहरूको सनाखत प्रक्रिया जारी रहेको छ। दुर्घटनाको कारण खुल्न बाँकी रहेको प्रहरीले जनाएको छ।

घटनास्थलमा नेपाल प्रहरी, सशस्त्र प्रहरी बल र नेपाली सेनासहित तीनवटै सुरक्षा निकायको समन्वयमा उद्धार कार्य भइरहेको छ। सशस्त्र प्रहरी बलको विपद् व्यवस्थापन वेश आदमघाटबाट सशस्त्र प्रहरी नायब उपरीक्षक सुनिल गिरिको कमाण्डमा तथा विपद् व्यवस्थापन तालिम शिक्षालय कुरिनटारबाट गोताखोरसहितको टोली परिचालन गरिएको जनाइएको छ।

दुर्घटनाबारे थप विवरण आउने क्रम जारी रहेको छ।