छात्रामाथि यौन दुर्व्यवहार गरेको आरोपमा शिक्षक पक्राउ

खोटाङ। खोटाङ मा १३ वर्षीया छात्रामाथि यौन दुर्व्यवहार गरेको आरोपमा एक शिक्षक पक्राउ परेका छन्।

पक्राउ पर्ने व्यक्ति दिक्तेल इंग्लिस बोर्डिङ स्कुल मा कार्यरत २४ वर्षीय शिक्षक रहेका छन्। उनी सोलुखुम्बुको थुलुङ दुधकोसी गाउँपालिका–१ का स्थायी बासिन्दा हुन्।

पीडित परिवारका अनुसार फागुन ९ गते गृहकार्य सिकाइदिने बहानामा शिक्षकले छात्रालाई आफ्नै कोठामा बोलाएका थिए। त्यस क्रममा जबरजस्ती करणी गरेको आरोप लगाइएको छ। घटनापछि बालिकालाई केही घण्टासम्म कोठाभित्रै राखिएको समेत परिवारले जनाएको छ।

बालिका रुँदै घर पुगेपछि मात्र अभिभावकले घटनाबारे जानकारी पाएका थिए। त्यसपछि बालिकाका बुवा र काकाले ती शिक्षकलाई उनकै कोठाबाट नियन्त्रणमा लिएर प्रहरीको जिम्मा लगाएका थिए।

बालिकाको स्वास्थ्य परीक्षण गरिसकेपछि जिल्ला प्रहरी कार्यालय खोटाङ मा शिक्षकविरुद्ध जबरजस्ती करणीसम्बन्धी मुद्दा दर्ता गरिएको प्रहरीले जनाएको छ।

घटनाबारे थप अनुसन्धान भइरहेको प्रहरीले जानकारी दिएको छ।