रौतहट घटना: वडाध्यक्षसहित २३ जना पक्राउ

गौर (रौतहट)। रौतहट को सदरमुकाम गौरमा दुई समुदायबीच भएको झडपका घटनामा वडाध्यक्षसहित २३ जनालाई प्रहरीले पक्राउ गरेको छ।

जिल्ला प्रहरी कार्यालय रौतहट का प्रहरी प्रवक्ता डिएसपी विष्णु प्रदीप बस्यालका अनुसार पक्राउ पर्नेमा गौर नगरपालिका–६ सबगढाका वडाध्यक्ष अवधविहारी साह र पूर्व वडाध्यक्ष तथा जनमत पार्टीका जिल्ला अध्यक्ष शेख जमसेदसहित २३ जना रहेका छन्।

गत बिहीबार सबगढा गाउँमा विवाह समारोहमा डिजे बजाउने विषयलाई लिएर दुई समुदायबीच विवाद सुरु भएको थियो। सो विवाद उग्र बन्दै झडपमा परिणत भएपछि अवस्था तनावपूर्ण बनेको थियो।

स्थिति नियन्त्रणबाहिर जान थालेपछि जिल्ला प्रशासन कार्यालय रौतहट ले शनिबार दिउँसो कर्फ्यु आदेश जारी गरेको थियो। सुरक्षा अवस्था मजबुत बनाउन नेपाली सेना समेत परिचालन गरिएको छ। निर्वाचन सुरक्षाका लागि खटिएको सेनाले गौर बजारसँगै आसपासका क्षेत्रलाई निगरानीमा राखेको जनाएको छ।

गौरमा भएको घटनाले सिंगो मधेस प्रदेश को सुरक्षामा प्रश्न उठाएको स्थानीय प्रशासनले जनाएको छ। निर्वाचनको संवेदनशील समयमा उत्पन्न भएको तनावले सुरक्षा चुनौती थपिएको विश्लेषण गरिएको छ।

विशेषगरी धार्मिक नाराबाजीका क्रममा उत्तेजना फैलिँदा झडपको अवस्था सिर्जना भएको बताइएको छ। बिहीबार रातिदेखि अशान्त बनेको गौर बजारमा शनिबार पनि तोडफोड र आगजनीका घटना भएका थिए।

प्रमुख जिल्ला अधिकारी दिनेश सागर भुसालको रोहबरमा शुक्रबार बेलुकी ६ बुँदे सहमति भएको भए पनि शनिबार बिहानैदेखि पुनः तनाव बढेको थियो।

हाल गौर बजार शान्त देखिए पनि कर्फ्यु आदेश जारी नै रहेको छ। सडक र विद्यालय बन्द छन् भने उम्मेदवारहरू चुनावी अभियानमा जान सकेका छैनन्। आइतबार बिहानदेखि दुवै समुदायका अगुवा, स्थानीय राजनीतिक दल तथा सुरक्षा निकायबीच पुनः वार्ता जारी रहेको डिएसपी बस्यालले जानकारी दिएका छन्।