राउटे समुदायका मुखिया सूर्यनारायण शाहीको निधन

दैलेख । नेपालको अन्तिम घुमन्ते–फिरन्ते राउटे समुदायका मुखिया सूर्यनारायण शाहीको निधन भएको छ। अत्यधिक मदिरा सेवनका कारण ४९ वर्षीय शाहीको सोमबार राति सुर्खेतको बराहताल गाउँपालिका–८, सोतखोलामा रहेको राउटे बस्तीमै मृत्यु भएको हो।

बस्तीमा कार्यरत शिक्षक लालबहादुर खत्रीका अनुसार, नयाँ वर्षको सुरुवातसँगै मुखिया शाहीले निरन्तर मदिरा सेवन गर्न थालेका थिए। “वैशाख १ यता अत्यधिक मदिरा सेवन गरिरहेका थिए,” खत्रीले भने, “दुई–तीन दिनदेखि बिरामी भएपछि उपचारको तयारी हुँदै थियो, तर सोमबार साँझ निधन भयो।”

शाहीको मृत्युमा बाह्य समुदायको हस्तक्षेप पनि एक कारण रहेको बताइएको छ। केही व्यक्तिहरूले बस्तीमा आएर “मुखिया” भन्दै पैसा दिने गरेकाले उनीमाथि थप दबाब परेको खत्रीले जनाए।

राउटे समुदायले परम्परागत विधिअनुसार मुखिया शाहीको अन्त्येष्टि गरिसकेको छ। समुदायमा कसैको मृत्यु भएमा बस्ती सर्ने परम्परा अनुसार अब उनीहरू नयाँ बस्ती खोज्ने तयारीमा छन्।

हाल राउटे समुदायको जनसंख्या १३५ मा झरेको छ। मुखिया शाहीको निधनसँगै समुदायमा नेतृत्व संकटको अवस्था सिर्जना भएको देखिन्छ।