आज बिहानै कास्कीमा ४.३ म्याग्निच्युडको भूकम्प

कास्की, फागुन २८ – कास्की जिल्लामा आज बिहान ४ बजेर ११ मिनेट जाँदा ४.३ म्याग्निच्युडको भूकम्प गएको छ। राष्ट्रिय भूकम्प मापन तथा अनुसन्धान केन्द्र, लैनचौरका अनुसार भूकम्पको केन्द्रविन्दु कास्कीको साइमाराङ आसपास रहेको छ।

भूकम्पको धक्का कास्कीसहित आसपासका जिल्लामा समेत महसुस गरिएको थियो। बिहानको शान्त वातावरणमा अचानक महसुस गरिएको कम्पनले स्थानीयहरूलाई निद्राबाट जगाएको छ। यद्यपि, हालसम्म कुनै ठूलो क्षति भएको विवरण प्राप्त नभएको केन्द्रले जनाएको छ।

यसअघि, फागुन २४ गते बागलुङ केन्द्रविन्दु भएर ४.१ म्याग्निच्युडको तथा म्याग्दी केन्द्रविन्दु भएर ४.० म्याग्निच्युडको भूकम्प गएको थियो।