काठमाडौंको नारायणचौरमा अवैध अनलाइन सट्टेबाजी चलाउँदै आएका चार जनालाई प्रहरीले पक्राउ गरेको छ। जिल्ला प्रहरी परिसर काठमाडौंका अनुसार पक्राउ पर्नेमा कालिकोटका टेकेन्द्र शाही, बर्दियाका विश्व रेग्मी र अजय महतरा तथा बाँकेका आदित्य वाल्मीकि रहेका छन्। प्रहरीले उनीहरूको साथबाट इन्टरनेट सर्भर, सिमकार्ड, ल्यापटप र मोबाइल फोनहरू बरामद गरेको छ। प्रारम्भिक अनुसन्धानबाट उनीहरूले विभिन्न सट्टेबाजी एप तथा वेबसाइटमार्फत मोबाइल बैंकिङ प्रयोग गरी करिब १ करोड ९६ लाख रुपैयाँभन्दा बढीको अवैध कारोबार गरेको खुलेको छ। पछिल्लो समय प्रविधिको दुरुपयोग गरी भइरहेका यस्ता अवैध गतिविधिप्रति प्रहरीले निगरानी बढाएको छ। पक्राउ परेका व्यक्तिहरूमाथि थप अनुसन्धान भइरहेको छ र कानुन बमोजिम कडा कारबाही हुने प्रहरीले जनाएको छ।