आज साउन १४ गते, विश्वभर ‘ठगीको जालभित्र थुनिएका’ भन्ने नाराका साथ अन्तर्राष्ट्रिय मानव बेचबिखन विरुद्धको दिवस मनाइँदै छ। यस वर्षको नाराले विशेषगरी अनलाइनमार्फत भइरहेका ठगी र त्यसको आडमा हुने जबर्जस्ती आपराधिक क्रियाकलाप तथा मानव बेचबिखनको गम्भीर समस्यालाई केन्द्रमा राखेको छ। संयुक्त राष्ट्र सङ्घको आह्वानमा सन् २०१३ देखि हरेक वर्ष जुलाई ३० का दिन यो दिवस मनाउन थालिएको हो, जसको मुख्य उद्देश्य बेचबिखनमा परेका पीडितहरूको पहिचान, संरक्षण र उनीहरूको सुरक्षित उद्धारका लागि विश्व समुदायलाई एकजुट गराउनु हो। अन्तर्राष्ट्रिय आप्रवासन सङ्गठन (आईओएम) ले समेत अनलाइन ठगीको जालोमा परेर शोषित भइरहेकाहरूको जीवन रक्षाका लागि तत्काल प्रभावकारी कदम चाल्न आग्रह गरेको छ। नेपालमा मानव बेचबिखन तथा ओसारपसार नियन्त्रण ऐन, २०६४ कार्यान्वयनमा रहेको छ, जसले यस्ता जघन्य अपराधमा संलग्नहरूलाई कडा कानुनी कारबाही र पीडितलाई उचित क्षतिपूर्ति तथा पुनस्र्थापनाको सुनिश्चितता गरेको छ। मानव अधिकारको रक्षा र सभ्य समाज निर्माणका लागि मानव बेचबिखनजस्तो अपराधविरुद्ध सचेत रहनु आजको टड्कारो आवश्यकता हो।