बच्चाको शारीरिक र मानसिक विकासका लागि उपयोगी बिहानका यी खानेकुरा

बालबालिकाको समग्र शारीरिक तथा मानसिक विकासका लागि उनीहरूको खानपानमा विशेष ध्यान दिनु आवश्यक हुन्छ। पोषक तत्त्वले भरिएको आहारले न केवल शारीरिक वृद्धि सहयोग गर्छ, मानसिक विकास र ऊर्जाको स्तर पनि कायम राख्न मद्दत गर्छ। विशेषज्ञहरूका अनुसार बिहानको खाजा बालबालिकाको दिनभरको सक्रियता र ध्यान क्षमतासँग प्रत्यक्ष रूपमा जोडिएको हुन्छ।

बालबालिकाको दैनिक बिहानको खाजामा समावेश गर्न सकिने केही महत्वपूर्ण खानेकुराहरू यस्ता छन्–

दुग्धजन्य पदार्थ
दूध, दही र चीज जस्ता दुग्धजन्य पदार्थ बालबालिकाका लागि अत्यन्त लाभदायक मानिन्छन्। यस्ता खाद्य पदार्थमा क्याल्सियम र फस्फोरस प्रशस्त मात्रामा पाइन्छ, जसले हड्डी, दाँत र नङको विकासमा सहयोग गर्छ। संयुक्त राज्य अमेरिकाको नेसनल लाइब्रेरी अफ मेडिसिनले प्रकाशित गरेको अनुसन्धान अनुसार दूधमा भिटामिन डी पनि प्रचुर मात्रामा पाइन्छ, जुन हड्डीको स्वास्थ्यका लागि आवश्यक हुन्छ। बढ्दो उमेरका बालबालिकालाई दैनिक एकदेखि दुई गिलास दूध सेवन गर्न सिफारिस गरिन्छ। सादा दूध मन नपर्ने बालबालिकाका लागि नट्स मिसाएर दिन सकिन्छ।

अण्डा
अण्डा बढ्दो उमेरका बालबालिकाका लागि पोषणको राम्रो स्रोत हो। यसमा उच्च मात्रामा प्रोटिन र भिटामिन बी पाइन्छ, जसले मस्तिष्कको विकास र कार्यक्षमतामा सहयोग पुर्‍याउँछ। अण्डामा ओमेगा–३ फ्याटी एसिड, भिटामिन डी, फोलेट, जिंक, आइरन र सेलेनियम पनि हुन्छ। अण्डालाई उसिनेर, ओमलेट बनाएर वा अन्य परिकारका रूपमा खुवाउन सकिन्छ। बिहानको खाजामा एकदेखि दुई अण्डा समावेश गर्दा दिनभरका लागि दिगो ऊर्जा प्राप्त हुने विज्ञहरू बताउँछन्।

ओट्स
ओट्सलाई बालबालिकाका लागि उत्कृष्ट ब्रेकफास्ट मानिन्छ। नेसनल लाइब्रेरी अफ मेडिसिनको एक अध्ययन अनुसार बिहान ओट्स खाने बालबालिकाले विद्यालयमा बढी ध्यान केन्द्रित गर्न सक्ने देखिएको छ। ओट्समा भिटामिन बी र ई, पोटासियम र जिंक जस्ता पोषक तत्त्व पाइन्छन्, जसले मस्तिष्क र शरीरको समग्र कार्यमा सहयोग गर्छ। ओट्सलाई दूध वा दहीसँग मिसाएर, माथि फलफूल थपेर खुवाउन सकिन्छ।

ब्रोकाउली
ब्रोकाउली क्याल्सियमको राम्रो तरकारी स्रोत मानिन्छ। यसमा फाइबर प्रशस्त मात्रामा पाइने भएकाले पाचन प्रणालीका लागि पनि उपयोगी हुन्छ। ब्रोकाउलीमा आइरन, म्याग्नेसियम, फस्फोरस, पोटासियम, जिंक र फोलिक एसिड जस्ता पोषक तत्त्व पनि पाइन्छन्। बालबालिकालाई मन नपरेको खण्डमा ब्रोकाउलीलाई सूप, क्यासरोल वा जुसको रूपमा समावेश गर्न सकिन्छ।

 यो सामग्रीले सामान्य जानकारी मात्र प्रदान गर्दछ। बालबालिकाको आहारमा कुनै पनि परिवर्तन गर्नु अघि चिकित्सक वा पोषण विशेषज्ञसँग परामर्श गर्नु उपयुक्त हुन्छ।

–एजेन्सीको सहयोगमा