वीरेन्द्रनगरमा सवारी ज्यान मुद्दामा फरार रहेका हस्ते सार्की पक्राउ

सुर्खेत । सवारी ज्यान सम्बन्धी मुद्दामा फरार रहेका एक जनालाई प्रहरीले पक्राउ गरेको छ।

जिल्ला प्रहरी कार्यालय सुर्खेतका अनुसार २०८२ फागुन २ गते बिहान करिब १०:४० बजे वीरेन्द्रनगर नगरपालिका–६ स्थित मंगलगढीबाट बाङ्गेसिमलतर्फ जाँदै गरेको भे १ क १४१४ नम्बरको ट्रकले पैदलयात्री ३२ वर्षीय प्रकाश महतरालाई ठक्कर दिएको थियो। महतरा लम्की चुहा नगरपालिका–१०, कैलालीका स्थायी बासिन्दा हुन् भने हाल वीरेन्द्रनगर–६ मा बस्दै आएका थिए। दुर्घटनामा गम्भीर घाइते भएका उनको उपचारका क्रममा मृत्यु भएको थियो।

उक्त घटनामा संलग्न भई फरार रहेका ४९ वर्षीय हस्ते सार्कीलाई प्रहरीले खोजतलासका क्रममा २०८२ फागुन ४ गते दिउँसो करिब ४:०० बजे वीरेन्द्रनगर नगरपालिका–४ बाट पक्राउ गरेको जनाएको छ।

पक्राउ परेका सार्कीलाई जिल्ला प्रहरी कार्यालयमा ल्याई सवारी ज्यान सम्बन्धी कसूरमा थप अनुसन्धान कार्य भइरहेको प्रहरीले जनाएको छ।