सुर्खेतमा प्रहरीद्वारा हवाई फायर गरी ब्राउनसुगरसहित एक जना पक्राउ

सुर्खेत ।  सुर्खेतमा हवाई फायर गरी ब्राउनसुगरसहित एक जनालाई प्रहरी टोलीले पक्राउ गरेको छ।

साेमबार राति करिब १०:०० बजे वीरेन्द्रनगर नगरपालिका–८ स्थित क्षेत्रमा लागूऔषध कारोबार भइरहेको सूचनापछि जिल्ला प्रहरी कार्यालय सुर्खेत र लागूऔषध नियन्त्रण शाखा कार्यालय सुर्खेतबाट संयुक्त प्रहरी टोली खटिएको थियो।

उक्त स्थानमा पुगेको टोलीले चिङ्गाड गाउँपालिका–४ बस्ने अन्दाजी ४७ वर्षीय ललित चन्दलाई शंकास्पद अवस्थामा फेला पारी नियन्त्रणमा लिन खोज्दा उनले प्रहरीमाथि हातपात तथा आक्रमण गरी लागूऔषधसहित भाग्ने प्रयास गरेका थिए।  साेही क्रममा प्रहरीले बल प्रयोगस्वरूप एक राउण्ड हवाई फायर गरी उनलाई नियन्त्रणमा लिएको जनाएको छ।

प्रहरीले खानतलासी गर्दा चन्दको साथबाट शुद्ध ३६ ग्राम ७३० मिलिग्राम लागूऔषध (ब्राउनसुगर) बरामद गरेको जनाएको छ। उनलाई नियन्त्रणमा लिई मुद्दा दर्ता गरिएको तथा म्याद थप गरी थप अनुसन्धान भइरहेको प्रहरीले जनाएको छ।