आईपीएल क्रिकेटमा आज बेंगलुरु र गुजरात  भिड्दै

२० चैत, काठमाडौं । भारतमा जारी इन्डियन प्रिमियर लिग (आईपीएल) क्रिकेटमा आज एक रोमाञ्चक खेल हुँदैछ। रोयल च्यालेन्जर्स बेंगलुरु (आरसीबी) र गुजरात टाइटान्स आमनेसामने हुँदै छन्।

बेंगलुरुस्थित एम. चिन्नास्वामी रंगशालामा खेल बेलुकी पौने ८ बजेदेखि सुरु हुनेछ। बेंगलुरुको कप्तानी रजत पाटिदारले गर्नेछन् भने गुजरातको कप्तानी शुभमन गिलले सम्हाल्नेछन्।

  बेंगलुरु हालसम्म अपराजित ३ टिममध्ये एक हो। सुरुवाती दुई खेलमा जित हात पारिसकेको बेंगलुरु आज घरेलु मैदानमा लगातार तेस्रो जित निकाल्ने लक्ष्यमा हुनेछ। बेंगलुरुले पहिलो खेलमा कोलकाता नाइट राइडर्सलाई र दोस्रो खेलमा चेन्नई सुपर किङ्सलाई हराएको थियो।

  गुजरात टाइटान्स पहिलो खेलमा पञ्जाब किङ्ससँग पराजित भएको थियो। तर, दोस्रो खेलमा मुम्बई इन्डियन्सलाई हराउँदै लय समातेको छ। आज बेंगलुरुको अपराजित यात्रा रोक्दै दोस्रो जित निकाल्ने लक्ष्यमा गुजरात हुनेछ।

  हाल बेंगलुरु ४ अंकसहित शीर्ष स्थानमा रहेको छ भने २ अंक रहेको गुजरात चौथो स्थानमा छ।

  हालसम्म बेंगलुरु र गुजरातबीच भएका खेलमा बेंगलुरुले ३ जित हात पारेको छ भने गुजरातले २ पटक जित निकालेको छ।