दाङको गढवा गाउँपालिका-५, चिसापानीस्थित लमही–कोइलाबास सडक खण्डमा बुधबार साँझ भएको बोलेरो दुर्घटनामा परी गढवा–६ का २६ वर्षीय सागर कुमालको निधन भएको छ। कोइलाबासबाट ४९ बोरा मलखाद बोकेर कपिलवस्तुतर्फ जाँदै गरेको लु २ च ९१३९ नम्बरको बोलेरो अनियन्त्रित भई सडक किनारमा पल्टिँदा सो दुर्घटना भएको हो। गम्भीर घाइते भएका कुमाललाई लमही अस्पताल र राप्ती स्वास्थ्य विज्ञान प्रतिष्ठानमा प्रारम्भिक उपचारपछि थप उपचारका लागि नेपालगञ्ज लगिएको थियो, तर उपचारकै क्रममा बुधबार राति ११:१५ बजे उनको मृत्यु भएको हो। दुर्घटनामा घाइते भएका अन्य तीन जना भने लमही अस्पतालबाट उपचारपछि घर फर्किसकेका छन्। प्रहरीले अहिले घटनाको थप अनुसन्धान गरिरहेको छ।