काठमाडौंको डिल्लीबजार क्षेत्रमा लागुऔषधको अवैध कारोबार भइरहेको विशेष सूचनाका आधारमा प्रहरीले छापा मार्दा ठूलो परिमाणमा गाँजा र नगद बरामद भएको छ। सिंहदरबार प्रहरी वृत्तबाट खटिएको टोलीले विशेष अपरेसन चलाउँदै ४ किलो ७२० ग्राम गाँजाको धुलोसहित दुई जनालाई पक्राउ गरेको हो। पक्राउ पर्नेमा रामेछापको मन्थली नगरपालिका–३ घर भई हाल काठमाडौं–२९ बस्ने ५४ वर्षीय श्याम खत्री र काभ्रेपलाञ्चोकको बनेपा नगरपालिका–१२ घर भई हाल काठमाडौं–२८ मा बस्दै आएका ४८ वर्षीय वसन्त थापा रहेका छन्। प्रहरीले उनीहरूको साथबाट लागुऔषध बिक्रीबाट आर्जित मानिएको एक लाख २५ हजार ८२५ रुपैयाँ नगद पनि बरामद गरेको छ। हाल दुवै जनालाई नियन्त्रणमा लिई लागुऔषध सम्बन्धी कसुरमा थप अनुसन्धान प्रक्रिया अगाडि बढाइएको प्रहरीले जनाएको छ। राजधानीको व्यस्त क्षेत्रमा नै यस प्रकारको अवैध गतिविधि फेला पर्नुले लागुऔषध नियन्त्रणमा थप सतर्कताको आवश्यकता देखिएको छ।