हतियार, लागुऔषध र वन्यजन्तुको अङ्गसहित वीरेन्द्रनगरबाट दुई पक्राउ

सुर्खेत। सुर्खेतको वीरेन्द्रनगरबाट प्रहरीले लागुऔषध, पेस्तोल, धारिलो हतियार र संरक्षित वन्यजन्तुको सिङसहित दुई जनालाई पक्राउ गरेको छ । जिल्ला प्रहरी कार्यालय सुर्खेतले गएराति करिब साढे ९ बजे वीरेन्द्रनगर नगरपालिका-६, कालिन्चोकस्थित राधाकृष्ण मन्दिर नजिकबाट उनीहरूलाई नियन्त्रणमा लिएको हो ।

पक्राउ पर्नेमा वीरेन्द्रनगर निवासी २३ वर्षीय विद्धान शाही र  एक २२ वर्षीय युवक रहेका छन् । प्रहरी स्रोतका अनुसार, पक्राउ परेका दोस्रो युवकले आफ्नो परिचय पटक-पटक फेरबदल गरी बताएकाले उनको वास्तविक पहिचान खुल्न सकेको छैन । प्रारम्भिक सोधपुछमा उनले आफ्नो नाम आदित्य घिमिरे बताए पनि प्रहरीले त्यसको अनुसन्धान गरिरहेको छ ।
प्रहरीले उनीहरूको साथबाट लागुऔषध, एक थान पेस्तोल, सो मा लाग्ने १२ राउण्ड गोली, एक थान खुकुरी र दुर्लभ वन्यजन्तु जरायोको सिङ बरामद गरेको जनाएको छ ।

जिल्ला प्रहरी कार्यालय सुर्खेतका प्रमुख, प्रहरी उपरीक्षक (एसपी) सुधीरराज शाहीले पक्राउ परेका व्यक्तिहरूले ती सामग्री कहाँबाट र के प्रयोजनका लागि ल्याएका हुन् भन्ने विषयमा विस्तृत अनुसन्धान भइरहेको जानकारी दिए । “अनुसन्धान जारी रहेकाले तत्काल थप विवरण सार्वजनिक गर्न मिल्दैन,” उनले भने ।
घटना बारे थप अनुसन्धान भइरहेकाे प्रहरीले जनाएकाे छ ।