फागुन २८, कालिकोट । सामुदायिक विद्यालयमा अध्ययनरत विद्यार्थीको वार्षिक परीक्षा सकिन लागे पनि उनीहरूले अझै पाठ्यपुस्तक पाएका छैनन् ।
कालिकोटका विद्यालयमा पाठ्यपुस्तकको चरम अभाव हुँदा विद्यार्थीको पठनपाठनमा नकारात्मक असर परेको छ । वार्षिक परीक्षा नजिकिँदै गर्दा पनि धेरै विद्यार्थीले पाठ्यपुस्तक पाउन सकेका छैनन्, सिकाइ क्रियाकलापका लागि सीमित सामग्री मात्रै बाँकी छ । सामुदायिक विद्यालयमा समयमै पाठ्यपुस्तक उपलब्ध गराउन नसकेको भन्दै कर्णाली प्रदेश सरकारको आलोचना भइरहेको छ । यसले गर्दा विद्यार्थीलाई आवश्यक शैक्षिक सामग्रीको पहुँच नहुँदा उनीहरुको पढाईमा बाधा पुगेको छ । कर्णालीका दुर्गम जिल्लाका विद्यार्थी पाठ्यपुस्तक नपाउँदा पुस्तक बिनै पढ्न बाध्य छन् । यसले उनीहरूका लागि परीक्षाको तयारी गर्न र पाठ्यक्रम पूरा गर्न चुनौतीपूर्ण बनाउँदैछ। कालिकोटका विद्यार्थीलाई पाठ्यपुस्तकविहीन छोड्नुमा राजनीतिक हस्तक्षेप र जवाफदेहिताको अभाव रहेको आरोप लगाइएको छ । स्थानीय सरकारहरू एक अर्कामा औंला उठाइरहेका छन्, र विद्यार्थीहरू बीचमा फसेका छन्, परिणामहरू भोगिरहेका छन् । सामुदायिक विद्यालयमा पाठ्यपुस्तक नहुँदा कर्णालीको शिक्षा प्रणाली संकटमा परेको छ । अत्यावश्यक सिकाइ सामग्रीमा विद्यार्थीको पहुँच नहुँदा उनीहरूको शैक्षिक प्रगतिमा ठूलो बाधा पुगेको छ । यस समस्यालाई सम्बोधन गर्न र सबै विद्यार्थीहरूलाई आवश्यक पाठ्यपुस्तकहरूमा पहुँच सुनिश्चित गर्न राज्य सरकारले छिट्टै काम गर्न आवश्यक छ।
दुर्गम जिल्लामा फागुनदेखि नै नयाँ शैक्षिक सत्र सुरु भइसक्छ, तर अहिलेसम्म सबै पाठ्यपुस्तक पाउन नसकिएको विद्यार्थीको गुनासो छ।
कालिकोटका धेरै विद्यालयमा पाठ्यपुस्तक पुग्न सकेको छैन। जिल्लाको सान्नीत्रिवेणी गाउँपालिका– ३ मा रहेको विद्याज्योति माध्यमिक विद्यालय कक्षा ८ को नेपाली र स्वास्थ्य विषयको पुस्तक पुगेको छैन।
खाँडाचक्र नगरपालिका– ३ ताडीको जनजीवन माविमा पनि केही पुस्तक पुगेको छैन।
कालिकोटको सान्नीत्रिवेणी गाउँपालिकाकी छात्रा आशा गिरीले पनि पाठ्यपुस्तकविना नै अध्ययन गर्नुपर्ने बाध्यता रहेको बताइन्।
माध्यमिक तहमा अध्ययनरत छात्रा आशाले भनिन्, ‘न समयमा हामीले किताब पाउँछौं न त विद्यालयमा सिकाइ गतिविधिका लागि पर्याप्त सामग्री नै छन्।’
पाठ्यपुस्तक, भौतिक संरचना र शिक्षक अभावजस्ता कारणले आफूहरूको सिकाइ प्रभावकारी बन्न नसकेको उनले बताइन्।
खाँडाचक्र– ३ स्थित जनजीवन माध्यमिक विद्यालयमा पनि पाठ्यपुस्तक अझै नपाएको विद्यार्थीको गुनोसो छ।
यस्तै शुभकालिका गाउँपालिका– ३ भर्तास्थित जनज्योति माध्यमिक विद्यालयमा पनि पुस्तक छैनन्। जिल्लाका सामुदायिक विद्यालयमा समयमै सबै विषयका पाठ्यपुस्तक नपुग्दा सिकाइ गतिविधि नै प्रभावित बनिरहेको छ।
विद्यार्थीका अनुसार यो शैक्षिक सत्रमा पनि सबै पाठ्यपुस्तक हातमा परेन। कतिपय विषयका किताब नै नदेखेर परीक्षा दिनुपर्ने अवस्था रहेको बिद्यार्थीहरु बताउँछन्।
शिक्षाका संरचनादेखि हरेक क्षेत्रमा प्रदेश सरकारले लगानी गरिरहेको अवस्थामा स्थानीय सरकार गैरजिम्मेवार बनेका कारण विद्यालयमा राजनीतिक हस्तक्षेप र प्रभाव बढेकाले विद्यार्थीले समयमै पुस्तक नपाउने गरेको स्थानीयको गुनासो छ।
कर्णाली प्रदेश सरकारले किताब किन्ने जिम्मेवारी पालिकाको भएको भन्दै त्यसका लागि प्रदेश सरकारबाट रकम निकासा भइसकेको जनाएको छ, तर कालिकोटका धेरै विद्यालयमा पाठ्यपुस्तक अभाव छ।
पालिकाहरूले भने किताब किन्ने जिम्मेवारी विद्यालयलाई दिएको बताउँदै आएका छन्।
पुस्तकका लागि विद्यालयको खातामा रकम पठाइसकिएको तर पुस्तक अभावका कारण विद्यार्थीका हातमा पुस्तक उपलब्ध नभएको विद्याज्योति माविका प्रधानाध्यापक मानप्रसाद देवकोटाले बताए।
उनले भने, ‘हामीले विद्यार्थीलाई पढाइमा निरन्तरता दिएकै छौं। समयमै किताब ल्याउन गएको पाएनौं। अहिले केही पुस्तक मात्र अभाव छन्। विद्यार्थीलाई समस्या त जहिल्यै हुन्छ।’
कर्णालीका सामुदायिक विद्यालयका विद्यार्थीले पुस्तक नपाउने समस्या बर्सेनि खेप्दै आएका छन्।
उनका अनुसार कर्णालीको कालिकोट, जुम्ला, दैलेख, सुर्खेत र जाजरकोटमा कक्षा ६ का विज्ञान, गणित र अंग्रेजी विषयका ६ हजार पुस्तक र कक्षा ८ का विभिन्न विषयका तीन हजार किताब पुग्न सकेको छैन।
