कर्णाली प्रदेश सरकारको भौतिक पूर्वाधार विकास मन्त्रालयका सवारी चालकको शव फेला

सुर्खेत  । कर्णाली प्रदेश सरकारको भौतिक पूर्वाधार विकास मन्त्रालयमा कार्यरत एक सवारी चालकको शव भेरी नदीमा फेला परेको छ।  २ हप्ताभन्दा बढी समयदेखि सम्पर्कविहीन रहेका उनको शव शुक्रबार सुर्खेतको बराहाताल गाउँपालिकास्थित भेरी नदी किनारमा भेटिएको हो।

दैलेखको चामुण्डाबिन्द्रासैनी नगरपालिका–२ निवासी अन्दाजी २९ वर्षीय हिमबहादुर विष्ट गत असार ६ गते कार्यालयमा ‘बिरामी छु’ भनी जानकारी दिएर निस्किएका थिए। त्यसपछि उनी सम्पर्कविहीन भएका थिए।

उनको खोजी गर्ने क्रममा असार ९ गते उनले प्रयोग गर्ने सरकारी मोटरसाइकल सुर्खेतको भेरीगंगा नगरपालिकास्थित भेरी पुल नजिक सडकमा बेवारिसे अवस्थामा फेला परेको जिल्ला प्रहरी कार्यालय सुर्खेतले जनाएकाे छ ।  

लगातारको खोजीपछि आज शुक्रबार बराहाताल गाउँपालिका–४, साजघाट क्षेत्रको भेरी नदी किनारमा उनको शव फेला परेको जिल्ला प्रहरी कार्यालय सुर्खेतका प्रहरी नायब उपरीक्षक (डिएसपी) मोहनजंग बुढथापाले  जानकारी दिनुभयाे।

   शवलाई पोस्टमार्टमका लागि प्रदेश अस्पताल सुर्खेत पठाउने तयारी भइरहेको र घटनाबारे थप अनुसन्धान सुरु गरिएको प्रहरीले जनाएको छ।