नेपालले टस जितेर ओमानविरुद्ध बलिङ गर्दै 

काठमाडौं । काठमाडौंमा जारी आईसीसी यू–१९ विश्वकप एसिया छनोट अन्तर्गत नेपालले आज दोस्रो खेलमा ओमानविरुद्ध प्रतिस्पर्धा गरिरहेको छ। काठमाडौंको माथिल्लो मुलपानी क्रिकेट मैदानमा नेपालले टस जितेर पहिला बलिङ गर्ने निर्णय लिएको छ।

नेपालले यसअघि आइतबार सम्पन्न पहिलो खेलमा युएईमाथि डिएल पद्दति अनुसार ५ रनले जित हासिल गर्दै प्रतियोगितामा विजयी सुरुवात गरेको थियो। यता ओमानले भने आफ्नो पहिलो खेलमा अफगानिस्तानसँग ८ विकेटको ठुलो अन्तरले पराजय भोगेको थियो।

यस छनोट प्रतियोगितामा नेपाल, अफगानिस्तान, युएई, ओमान र हङकङ गरी पाँच टोली सहभागी छन्। राउन्ड–रोबिन आधारमा चलिरहेको प्रतियोगिताबाट शीर्ष स्थान हासिल गर्ने एक टोली मात्र सन् २०२६ मा हुने यू–१९ विश्वकपका लागि छनोट हुनेछ।

आजै अर्को खेलमा तल्लो मुलपानी मैदानमा अफगानिस्तान र हङकङबीच प्रतिस्पर्धा हुँदैछ।

नेपालले घरेलु मैदान र दर्शकहरूको साथमा विजयी लयलाई निरन्तरता दिँदै विश्वकप यात्रा सुनिश्चित गर्ने लक्ष्य लिएको छ। आजको खेल नेपालका लागि आत्मविश्वास बढाउने अवसर पनि हो।