प्रहरीमाथि आक्रमण गर्ने दुई विद्यार्थीविरुद्ध पाँच दिनको म्याद थप

ठमेलमा ड्युटीमा खटिएका प्रहरीमाथि आक्रमण गरेको आरोपमा पक्राउ परेका दुई जनाविरुद्ध पाँच दिनको म्याद थप भएको छ।

पक्राउ परेका व्यक्तिहरूमा ताप्लेजुङका २६ वर्षीय दिनेश सिग्देल र डडेलधुराका २२ वर्षीय रमेश फुलारा रहेका छन्। उनीहरूलाई अभद्र व्यवहारको कसुरमा जिल्ला प्रशासन कार्यालय काठमाडौंले पाँच दिनको म्याद दिएको छ।

उनीहरूले दरबारमार्गस्थित केशरमहल बिटबाट खटिएको क्विक रेस्पोन्स टोली (क्यूआरटी) का प्रहरीलाई आक्रमण गर्दै मोटरसाइकल लडाउनुका साथै कुटपिट गरेका थिए। घटनामा दुई प्रहरी घाइते भएका छन्।

पक्राउ परेका दुवै जना अमृत साइन्स क्याम्पस (अस्कल)का विद्यार्थी तथा नेकपा एमालेको विद्यार्थी संगठनमा आबद्ध रहेको जिल्ला प्रहरी परिसर काठमाडौंका एसपी अपिलराज बोहोराले जानकारी दिएका छन्।