चौकुने गाउँपालिकामा सामाजिक सुरक्षा कोष सम्बन्धी १ दिने अभिमुखीकरण कार्यक्रम सम्पन्न

सुर्खेत। चौकुने गाउँपालिका तथा सामाजिक सुरक्षा कोष र EWPN कार्यक्रमको संयुक्त आयोजनामा सामाजिक सुरक्षा कोष सम्बन्धी १ दिने अभिमुखीकरण कार्यक्रम सम्पन्न भएको छ। चौकुने गाउँपालिका अध्यक्ष खडक बि.क. (विवश) बासपानेको अध्यक्षतामा सम्पन्न कार्यक्रममा गाउँपालिका उपाध्यक्ष नर बहादुर बान्तोला विशेष अतिथिको रूपमा उपस्थित रहनुभएको थियो। त्यसैगरी सामाजिक विकास समिति संयोजक तथा वडा नं. ८ का वडा अध्यक्ष कमल जि.सी., वडा नं. ३ का वडा अध्यक्ष गणेश कुमार राना मगर, वडा नं. १ का वडा अध्यक्ष जिरक वडुवाल लगायत चौकुने गाउँपालिकाका विभिन्न शाखाका प्रमुख, कार्यपालिका सदस्य, कर्मचारी तथा अन्य सरोकारवालाहरूको उल्लेखनीय उपस्थिति रहेको थियो।

कार्यक्रमको उद्देश्य तथा विषयवस्तुबारे तारा कडेलले जानकारी प्रस्तुत गर्नुभएको थियो। भने कार्यक्रममा सामाजिक सुरक्षा कोषका निर्देशक डाक्टर रोशन कोजुले सामाजिक सुरक्षा कोषको उद्देश्य, योगदानमा आधारित सामाजिक सुरक्षा प्रणाली तथा श्रमिक र रोजगारदाताले प्राप्त गर्ने विभिन्न सुविधाबारे विस्तृत जानकारी गराउनुभएको थियो। कार्यक्रममा सामाजिक सुरक्षा कोषको महत्व, यसको कार्यान्वयन प्रक्रिया र लाभग्राहीले प्राप्त गर्ने सेवासुविधाका विषयमा छलफल तथा अन्तरक्रिया समेत गरिएको थियो।

कार्यक्रमका अध्यक्ष खडक बि.क. (विवश) बासपानेले सामाजिक सुरक्षा कार्यक्रमले श्रमिक तथा कर्मचारीहरूको सामाजिक तथा आर्थिक सुरक्षालाई सुदृढ बनाउन महत्वपूर्ण भूमिका खेल्ने विश्वास व्यक्त गर्दै यसको प्रभावकारी कार्यान्वयनमा गाउँपालिका प्रतिबद्ध रहेको बताउनुभयो। सहभागीहरूको जिज्ञासा समाधान तथा सुझाव आदानप्रदानसँगै कार्यक्रम सम्पन्न भएको थियो।