“जग्गा-जमिन र सुन होइन, ‘डिजिटल फ्यान’ नै बालेनको सम्पत्ति ! ४० लाख फेसबुक फलोअर्स र १२ लाख युट्युब सब्सक्राइबर अब सरकारी रेकर्डमा।”

नेपाल सरकारका प्रधानमन्त्री बालेन्द्र शाहले आफ्नो सम्पत्ति विवरणमा भौतिक सम्पत्तिसँगै डिजिटल पहुँचलाई पनि विशेष स्थान दिएका छन्। सामाजिक सञ्जालमार्फत नै व्यापक लोकप्रियता कमाएका शाहले सोही माध्यमलाई आफ्नो मुख्य शक्तिको रूपमा आधिकारिक सरकारी अभिलेखमा दर्ता गराएका हुन्।

उनले बुझाएको सम्पत्ति विवरण फारमको ‘अन्य सम्पत्ति’ को महलमा आफ्ना सामाजिक सञ्जालका खाताहरूको विवरण खुलाएका छन्। जसअनुसार उनका फेसबुकमा ४ मिलियन (४० लाख), युट्युबमा १.२ मिलियन (१२ लाख) सब्सक्राइबर र एक्स (ट्विटर) मा ५ लाख १० हजार फलोअर्स रहेका छन्।

इन्जिनियरिङ र र्‍याप गायनबाट चर्चामा आएका बालेन शाहको राजनीतिक यात्रा र लोकप्रियताको प्रमुख आधार सामाजिक सञ्जाल नै रहँदै आएको छ। काठमाडौँ महानगरपालिकाको निर्वाचनदेखि प्रधानमन्त्रीको पदसम्म आइपुग्दा उनले आफ्ना समर्थकहरूसँग प्रत्यक्ष जोडिन यी माध्यमहरूको प्रभावकारी प्रयोग गरेका छन्। सामान्यतया नेताहरूले घर, जग्गा र नगदलाई मात्र सम्पत्ति मान्ने गरेकोमा बालेनले भने ‘डिजिटल इन्फ्लुएन्स’ लाई पनि अमूल्य पुँजीको रूपमा प्रस्तुत गरेका छन्।