व्यवसायी घिमिरेको दाबी : तत्काल पेट्रोलियम पदार्थको अभाव हुँदैन

मंगलबार नेपाल आर्थिक पत्रकार संघ (नाफिज) को आयोजनामा सम्पन्न ‘पश्चिम एसियाको द्वन्द्वः नेपालको अर्थतन्त्र र आपूर्ति व्यवस्थामा पर्ने असर’ विषयक अन्तरक्रिया कार्यक्रममा बोल्दै उनले तत्काल अभावको अवस्था नदेखिएको स्पष्ट पारे।

उनले समय–समयमा विभिन्न कारणले नेपालमा पेट्रोलियम पदार्थ अभाव हुने गरेकाले अन्तर्राष्ट्रिय द्वन्द्व हुँदा सर्वसाधारणमा त्रास फैलनु स्वाभाविक भएको बताए। “विगतका अभ्यासलाई हेर्दा त्रसित हुनु अस्वाभाविक होइन, तर समग्र अवस्था विश्लेषण गर्दा तत्काल अभाव हुने संकेत देखिँदैन,” घिमिरेले भने।

उनका अनुसार पश्चिम एसियामा जारी द्वन्द्वका कारण उत्पादन र आपूर्ति शृंखलामा केही असर पर्ने सम्भावना रहे पनि त्यसको प्रत्यक्ष प्रभाव तत्काल नेपालमा नपर्ने तर्क गरे। केही दिनअघि ग्यास अभावको हल्ला फैलिएपछि समग्र इन्धन अभाव हुने हो कि भन्ने चिन्ता बढेको उनले उल्लेख गरे।

घिमिरेका अनुसार ग्यास आपूर्ति शृंखला अन्य इन्धनभन्दा फरक प्रकृतिको छ। नेपालमा ग्यास ढुवानीका लागि भारतीय बुलेट मात्र प्रयोग हुने र ढुवानीकर्ता पनि भारत नै भएकाले कहिलेकाहीँ समस्या देखिने गरेको उनले बताए। भारतीय आयातकर्ताले बढी नाफा खोज्दै भारतमै प्राथमिकता दिने प्रवृत्तिले नेपालमा असहजता सिर्जना गर्ने गरेको उनको भनाइ छ।

तर हाल बुलेट अभावको समस्या समाधान भइसकेको र जाडो सकिँदै जाँदा खपत पनि घट्ने भएकाले ग्यास अभावको अवस्था नरहेको उनले दाबी गरे। साथै, द्वन्द्वका कारण केही उडान रद्द हुँदा हवाई इन्धनको खपत घटेको र भण्डारण पर्याप्त रहेको भन्दै सर्वसाधारणलाई त्रासमा नबस्न आग्रह गरे।