फागुन २१ को चुनाव जनमत सङ्ग्रहजस्तै हो : पुष्पकमल दाहाल

काठमाडौँ – नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले फागुन २१ गते हुने निर्वाचनलाई नेपाली जनताको आत्मनिर्णयको अधिकार रक्षा गर्ने ठूलो जनमत सङ्ग्रहजस्तै भएको बताएका छन्।

शनिबार कपिलवस्तुको कृष्णनगरमा आयोजित चुनावी सभालाई सम्बोधन गर्दै प्रचण्डले मुलुकको रक्षा र राष्ट्रिय एकताको सुदृढीकरणका लागि सबै शक्ति एकजुट हुनुपर्ने आवश्यकता औँल्याए। उनले आगामी निर्वाचनलाई राष्ट्रको भविष्य निर्धारण गर्ने महत्वपूर्ण अवसरका रूपमा चित्रित गरे।

प्रचण्डका अनुसार निर्वाचनमा राष्ट्रको एकतालाई प्रवर्द्धन गर्न चाहने शक्ति र राष्ट्रलाई सङ्कटतर्फ धकेल्ने प्रवृत्ति बीच प्रतिस्पर्धा भइरहेको छ। “राष्ट्र बचाउने र राष्ट्रिय एकताको पक्षमा दृढतापूर्वक उभिने शक्तिलाई मतदान गर्ने या अन्य विकल्प रोज्ने भन्ने एउटा अहम प्रश्न मतदाताको अगाडि छ,” उनले भने।

उनले मुलुकमा निर्वाचनको वातावरण सिर्जना हुनु नै पार्टीका लागि गर्वको विषय भएको उल्लेख गर्दै नेकपाको पक्षमा सकारात्मक परिणाम आउने दाबी गरे। जनताको व्यापक समर्थनका आधारमा पार्टीले सशक्त उपस्थिति जनाउने विश्वास व्यक्त गर्दै प्रचण्डले मतदातालाई आफ्नो अधिकार सचेत रूपमा प्रयोग गर्न आह्वान गरे।