ट्रम्पले खारेज गरे ओबामाकालीन जलवायु सम्बन्धी महत्वपूर्ण निर्णय

वासिङ्टन डीसी । अमेरिकी राष्ट्रपति डोनल्ड ट्रम्प नेतृत्वको प्रशासनले ओबामा कार्यकालमा लागू गरिएको जलवायु परिवर्तनसम्बन्धी महत्वपूर्ण वैज्ञानिक निर्णय उल्ट्याएको छ। सन् २००९ मा अमेरिकी पर्यावरण संरक्षण एजेन्सी (EPA)ले जारी गरेको ‘एन्डेन्जरमेन्ट फाइन्डिङ’ खारेज गर्ने घोषणा गरिएको हो।

उक्त निष्कर्षले कार्बन डाइअक्साइड, मिथेनसहितका हरितगृह ग्यास मानव स्वास्थ्य र वातावरणका लागि खतरनाक ठहर गर्दै संघीय सरकारलाई कार, उद्योग तथा ऊर्जा क्षेत्रमा कार्बन उत्सर्जन नियन्त्रण गर्ने कानुनी आधार प्रदान गरेको थियो।

ह्वाइट हाउसले यस कदमलाई अमेरिकी इतिहासकै सबैभन्दा ठूलो नियमन हटाउने निर्णयको रूपमा व्याख्या गर्दै यसबाट सवारीसाधनको लागत घट्ने दाबी गरेको छ। ट्रम्प प्रशासनका अनुसार नयाँ नीतिले अटो उद्योगको खर्च घटाएर गाडीको मूल्य औसतमा करिब २ हजार ४०० डलरसम्म सस्तो हुन सक्ने बताइएको छ।

तर वातावरणविद् र सार्वजनिक स्वास्थ्यसम्बन्धी समूहहरूले यसलाई जलवायु नीतिमाथिको गम्भीर आक्रमणको संज्ञा दिएका छन्। उनीहरूका अनुसार यस निर्णयले प्रदूषण बढाउने, स्वास्थ्य जोखिम उच्च बनाउने र जलवायु परिवर्तन नियन्त्रणका प्रयास कमजोर पार्ने खतरा रहेको छ। पूर्व राष्ट्रपति बाराक ओबामाले समेत यो कदमले अमेरिकी नागरिकलाई कम सुरक्षित र कम स्वस्थ बनाउने टिप्पणी गरेका छन्।

कानुनी विज्ञहरूका अनुसार उक्त निर्णयविरुद्ध चाँडै अदालतमा चुनौती आउन सक्नेछ। यसअघि अमेरिकी सर्वोच्च अदालतले EPA लाई हरितगृह ग्यास नियमन गर्ने अधिकार भएको ठहर गरिसकेको थियो। आलोचकहरूले ट्रम्प प्रशासनको यो कदमले आगामी वर्षहरूमा अमेरिकी जलवायु नीति तथा विश्वव्यापी वातावरणीय प्रयासमा गम्भीर प्रभाव पार्न सक्ने चेतावनी दिएका छन्।