युके पठाइदिन्छु भन्दै ठगी गर्ने व्यक्ति पक्राउ

काठमाडौं — वैदेशिक रोजगारीमा आकर्षक तलबको प्रलोभन देखाई युके पठाइदिन्छु भन्दै रकम ठगी गरेको अभियोगमा प्रहरीले एक जनालाई पक्राउ गरेको छ।

पक्राउ पर्ने व्यक्ति भक्तपुरको मध्यपुर थिमि नगरपालिका–२ मा बसोबास गर्दै आएका ललितपुर महानगरपालिका–१६ घर भएका ३४ वर्षीय अमन महर्जन हुन्।

प्रहरीका अनुसार महर्जनले युकेमा रोजगारी दिलाइदिने भन्दै तीन जना पीडितबाट २८ लाख रुपैयाँ लिई लामो समयदेखि सम्पर्कबिहीन भएका थिए। पीडितहरूको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले उनलाई मध्यपुर थिमि नगरपालिका–२ क्षेत्रबाट पक्राउ गरेको हो।

पक्राउ परेका महर्जनलाई आवश्यक अनुसन्धान तथा कानुनी कारबाहीका लागि वैदेशिक रोजगार विभाग, ताहाचल, काठमाडौं पठाइएको प्रहरीले जनाएको छ।