बाल यौन दुराचारको अभियोगमा एक नेपालीलाई बेलायतमा २५ वर्ष जेल

बेलायतको पिटरबरोस्थित क्याम्ब्रिज क्राउन कोर्टले नेपाली नागरिक प्रमोद ढकाललाई सात बालिका र एक महिलामाथि गरिएको यौन दुराचारका एकूटी २५ वटा अभियोगमा दोषी ठहर गर्दै २५ वर्षको जेल सजाय सुनाएको छ।
४९ वर्षीय ढकालले लामो समयदेखि नेपाली समुदायभित्र घनिष्ठ सम्बन्ध र धार्मिक गतिविधिमार्फत भरोसा कायम गर्दै आएका थिए। अदालतका अनुसार उनले करिब १७ वर्षको अवधि दौरान विभिन्न धार्मिक कार्यक्रम र भेटघाटका नाममा पीडितहरूलाई लक्षित गर्दै यौन दुर्व्यवहार गरेका थिए।
क्याम्ब्रिज क्राउन कोर्टमा भएको सुनुवाइका क्रममा ढकालले आठ वर्षकी बालिकासमेत बलात्कार गरेको खुलासा भएको अभियोजनकर्ता क्लेयर म्याथ्यूजले जानकारी दिइन्। उनका अनुसार एक पीडिताले ढकाललाई “दोस्रो बुबा” जस्तै मानेकी थिइन्, जसकारण सांस्कृतिक दबाब र डरले उनले धेरै वर्षसम्म बोल्न नसकेको बताइएको छ।
ढकालविरुद्ध सञ्चित प्रमाण र पीडितहरूको बयानको आधारमा अदालतले १३ वर्षभन्दा कम उमेरका पाँच बालिका तथा १३ वर्षभन्दा माथिका दुई बालिकामाथि भएका बलात्कार र यौन दुराचारका घटनालाई अत्यन्त गम्भीर अपराधका रूपमा व्याख्या गर्दै कडा सजाय सुनाएको हो।
अभियोजन पक्षका अनुसार उनका अधिकांश अपराधहरू पिटरबरोमै भएका थिए।
अदालतले ढकाललाई काठमाडौँमा रहेका उनका पारिवारिक तथा सामाजिक सम्पर्कका कारण थप जोखिम हुनसक्ने भन्दै दीर्घकालीन कारावास आवश्यक रहेको ठहर गरेको छ।