सुर्खेतमा ब्राउनसुगरसहित तीन जना पक्राउ

सुर्खेत, १८ कार्तिक। सुर्खेतमा लागूऔषध ब्राउनसुगरसहित तीन जनालाई प्रहरीले पक्राउ गरेको छ। साेमबार प्रहरीले वीरेन्द्रनगर नगरपालिकाका विभिन्न स्थानबाट उनीहरुलाई पक्राउ गरी १५ ग्राम ९० मिलिग्राम ब्राउनसुगर बरामद गरेको हो।
जिल्ला प्रहरी कार्यालयका प्रवक्ता, प्रहरी नायव उपरीक्षक मोहनजंग बुढाथापाका अनुसार, पक्राउ पर्नेमा वीरेन्द्रनगर-५ का २८ वर्षीय हिमाल आले, वीरेन्द्रनगर-४ का २६ वर्षीय सरोज ढकाल र वीरेन्द्रनगर-९ का ४७ वर्षीय प्रेम गुरुङ रहेका छन्।

गोप्य सूचनाको आधारमा खटिएको प्रहरी टोलीले सुरुमा आलेलाई शंकास्पद अवस्थामा फेला पारी चेकजाँच गरेको थियो। उनको साथबाट केही मात्रामा ब्राउनसुगर बरामद भएपछि थप अनुसन्धान गर्दा ढकाल र गुरुङ पनि पक्राउ परेका हुन्।
प्रहरीले उनीहरुको साथबाट कुल १५ ग्राम ९० मिलिग्राम ब्राउनसुगर, नगद रु एक लाख एकहतर हजार तिन सय तिस, २ थान कैँची र १ थान प्लाष्टिकको टुक्रा समेत बरामद गरेको छ।
पक्राउ परेका तीनै जनालाई नियन्त्रणमा लिई लागूऔषध सम्बन्धी कसुरमा थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।