यसरी बदाम खाँदा दोहोरो फाइदा

जाडो र मनसुनको मौसममा बदाम खानुको आनन्द मात्र होइन, स्वास्थ्यका दृष्टिले पनि ठूलो लाभ हुन्छ। भुटेर खाए पनि वा सलादमा मिसाएर सेवन गरे पनि बदामले शरीरलाई ऊर्जा दिन्छ र धेरै गम्भीर समस्याबाट जोगाउँछ।

बदाममा पाइने स्वस्थ बोसो र ओमेगा–३ फ्याटी एसिडले मुटु स्वस्थ राख्छ। यसले खराब कोलेस्ट्रोल घटाएर राम्रो कोलेस्ट्रोल बढाउँछ, जसले हृदयघात र स्ट्रोकको जोखिम कम गर्छ। धेरैको धारणा विपरीत, बदाम तौल बढाउने होइन घटाउन उपयोगी हुन्छ। सही मात्रामा खाँदा यसले लामो समय पेट भरेको महसुस गराउँछ।

त्यस्तै, बदाममा क्याल्सियम, फस्फोरस र म्याग्नेसियम प्रशस्त मात्रामा हुने भएकाले हड्डी र दाँत बलियो बनाउँछ। मधुमेह नियन्त्रणमा पनि यो उपयोगी छ, किनकि यसमा पाइने म्याग्नेसियम र स्वस्थ बोसोले रगतमा चिनीको मात्रा नियन्त्रण गर्छ।

बदाममा पाइने भिटामिन ‘ई’ र एन्टिअक्सिडेन्टले छालालाई चम्किलो बनाउन र कपाललाई बलियो बनाउन मद्दत गर्छ। नियमित सेवनले कपाल झर्ने समस्या घट्छ। यसका साथै, फाइबरको कारण पाचन सुधार हुन्छ र कब्जियत हट्छ।

तनाव र थकान कम गर्ने गुण पनि बदाममा हुन्छ। यसमा पाइने ट्रिप्टोफानले सेरोटोनिन हर्मोन बढाएर तनाव कम गर्छ र प्रोटिन तथा खनिजले शरीरलाई तुरुन्त ऊर्जा दिन्छ।

यसरी नियमित रूपमा बदाम सेवन गर्दा स्वास्थ्यमा दोहोरो फाइदा पाउन सकिन्छ।