दैलेखको आठबिस नगरपालिकाले ल्यायो इ-हाजिर, पारदर्शिता र सुशासनको नयाँ पाइला

दैलेख। दैलेखको आठबिस नगरपालिकाले आफ्नो कार्यालयमा डिजिटल युगको सुरुवात गर्दै इ-हाजिर प्रणाली लागू गरेको छ। यो कदमले नगरपालिकाको प्रशासनिक कामकारबाहीमा ठूलो परिवर्तन ल्याउने अपेक्षा गरिएको छ। अब कुन कर्मचारी कतिबेला कार्यालय आउँछन् र जान्छन् भन्ने कुराको रेकर्ड स्पष्ट देखिनेछ, जसले गर्दा काममा ढिलासुस्ती र अनियमितता हट्ने विश्वास लिइएको छ।

आठबिस नगरपालिकाले कर्मचारीहरूको उपस्थिति र समय पालनालाई पारदर्शी र व्यवस्थित बनाउन इलेक्ट्रोनिक हाजिरी (इ-हाजिर) प्रणाली सुरु गरेको हो। प्रमुख प्रशासकीय अधिकृत विनोद कुमार माझीका अनुसार, यो प्रणालीको मुख्य लक्ष्य कार्यालयलाई प्रविधिमैत्री बनाउनु र कर्मचारीहरूलाई थप जिम्मेवार बनाउनु हो। यसले प्रशासनिक कार्यमा छिटोछरितोपन ल्याउने र सेवाप्रवाहलाई प्रभावकारी बनाउने नगरपालिकाको दाबी छ।

इ-हाजिरको सुरुवात आठबिस नगरपालिकाले अघि सारेको बृहत् प्रशासनिक सुधार अभियानको एक हिस्सा मात्र हो। यसबाहेक, नगरपालिकाले करारमा रहेका अनावश्यक कर्मचारीको दरबन्दी खारेज गर्ने, लामो समयदेखि रोकिएको बजेटलाई निकास दिने, सरकारी गाडीको दुरुपयोग रोक्ने र कर्मचारी अनुशासनलाई कडा बनाउने जस्ता महत्वपूर्ण निर्णयहरू पनि गरेको छ। प्रमुख प्रशासकीय अधिकृत माझीले भने, “हाम्रो उद्देश्य पालिकाको काममा सुधार ल्याई नागरिकलाई नियमित र भरपर्दो सेवा दिनु हो। इ-हाजिरले कर्मचारीको निगरानीदेखि अनावश्यक खर्च कटौतीसम्ममा सघाउ पुर्‍याउनेछ।” यी सुधारका प्रयासहरूले नगरपालिकालाई थप सुव्यवस्थित र नागरिकप्रति उत्तरदायी बनाउने देखिन्छ।