नेपाली महिला टोली आज साउदीसँग प्रतिस्पर्धा गर्दै

 साउन २३  — एएफसी यू–२० महिला एसियन कप छनोट अन्तर्गत नेपाली महिला फुटबल टोलीले आज साउदी अरेबियासँग प्रतिस्पर्धा गर्दै छ । भुटानको राजधानी थिम्पुस्थित चाङलिमिथाङ स्टेडियममा दिउँसो १ः४५ बजे खेल सुरु हुनेछ।

नेपालले प्रतियोगिताको पहिलो खेलमा आयोजक भुटानसँग १–१ को बराबरी खेल्दै अंक बाँडेको थियो। त्यस्तै, साउदी अरेबियाले भने आफ्नो पहिलो खेलमा शक्तिशाली उत्तर कोरियासँग १५–० को फराकिलो हार व्यहोरेको थियो।

नेपालले आगामी खेलमा दुई पटकको विश्व च्याम्पियन उत्तर कोरियासँग प्रतिस्पर्धा गर्न बाँकी छ। प्रतियोगितामा हरेक समूहका विजेता तथा दुई उत्कृष्ट उपविजेता टोलीले आगामी यू–२० महिला एसियन कपमा स्थान बनाउनेछन्।

नेपालको लागि साउदीविरुद्धको खेल जित्नैपर्ने महत्त्वको रहेको छ ।