अमेरिकामा कार दुर्घटना : २ जना नेपाली विद्यार्थीको मृत्यु, २ जना घाइते

अमेरिकाको लुइजियाना राज्यमा भएको कार दुर्घटनामा दुई नेपाली विद्यार्थीको मृत्यु भएको छ भने अन्य दुई गम्भीर घाइते भएका छन्।। लुइजियाना टेक विश्वविद्यालयमा अध्ययनरत २२ वर्षीय राजन यादव र २० वर्षीय रोजिन ओलीको कार दुर्घटनामा परी ज्यान गएको हो।

लुइजियानाका स्थानीय मिडिया रिपोर्ट अनुसार शनिबार राति यूएस–८० राजमार्गको १६६ किलोमिटर क्षेत्रको सडकबाट कार तल खस्दा दुर्घटना भएको हो। कार रूखमा ठोक्किएपछि आगलागी भएको बताइएको छ।
कारमा चार जना सवार रहेका थिए ।
लुइजियाना टेक विश्वविद्यालयको अन्तर्राष्ट्रिय विद्यार्थी मामिला कार्यालयले नेपालस्थित परिवारहरूसँग समन्वय गर्दै थप प्रक्रिया अगाडि बढाउने जनाएको छ।

दुर्घटनापछि स्थानीय प्रहरीले घटनाको विस्तृत अनुसन्धान अघि बढाएको छ। विश्वविद्यालय र नेपाली समुदायले दुःख व्यक्त गर्दै मृतकको आत्माको चिरशान्तिको कामना गरेका छन्।