सुर्खेतकाे भेरी नदीमा हाम फालेर ६० वर्षीय पुरुष बेपत्ता 

सुर्खेत । सुर्खेतको गुर्भाकोट नगरपालिकास्थित भेरी नदीमा हाम फालेर एक जना व्यक्ति बेपत्ता भएका छन्। गुर्भाकोट नगरपालिका-११, सिमखोलीका ६० वर्षीय गोपाल वलीले मंगलबार दिउँसो पुलबाट नदीमा हाम फालेर बेपत्ता भएको प्रहरीले जनाएको छ।

जिल्ला प्रहरी कार्यालय सुर्खेतका अनुसार, मंगलबार दिउँसो अन्दाजी २:२० बजेको समयमा वलीले गुर्भाकोट नगरपालिका-१०, भेडाबारीस्थित भेरी नदीको पुलबाट हाम फालेका थिए। घटनाबारे दिउँसो २:३५ बजे प्रहरी चौकी मेहलकुनामा जानकारी प्राप्त भएको थियो।

खबर पाउनासाथ प्रहरी चौकी मेहलकुनाबाट प्रहरी सहायक निरीक्षक (प्रसनि) भुपेन्द्र अधिकारीको कमाण्डमा ५ जनाको प्रहरी टोली तत्काल घटनास्थलमा खटिएको थियो।  

वर्षायामका कारण भेरी नदीमा पानीको बहाव बढेकाले खोजी कार्यमा केही कठिनाइ भइरहेको प्रहरीले जानकारी दिएको छ। वलीले के कारणले पुलबाट हाम फाले भन्नेबारे खुल्न सकेको छैन र घटनाबारे थप अनुसन्धान भइरहेको प्रहरीले जनाएको छ।