पहिरोले कालीगण्डकी करिडोर पूर्ण रूपमा अवरुद्ध

बागलुङ – लगातारको वर्षाले बागलुङ खण्डअन्तर्गतको कालीगण्डकी करिडोर अवरुद्ध भएको छ। मङ्गलबार साँझदेखि परेको भारी वर्षाका कारण पहिरो खसेपछि करिडोरमा सवारी आवागमन पूर्ण रूपमा ठप्प भएको हो।

जिल्ला प्रहरी कार्यालय बागलुङका सूचना अधिकारी वसन्त पाण्डेका अनुसार बागलुङ नगरपालिका–१० दब्ल्याङ क्षेत्र आसपासमा ठूलो पहिरो खसेपछि सडक अवरुद्ध भएको छ। “वर्षा नरोकिएकाले तत्काल सडक खुलाउन सकिने अवस्था छैन,” पाण्डेले बताए, “पानी रोकिएपछि मात्रै पहिरो पन्छाउने काम सुरु हुन्छ।”

सडकको केही स्थानमा भासिएको समेत जानकारी दिँदै प्रहरीले यात्रुहरूलाई वैकल्पिक मार्ग प्रयोग गर्न आग्रह गरेको छ।

स्थानीय बासिन्दा र यात्रुहरू पहिरोका कारण हैरानीमा परेका छन् भने सुरक्षा निकाय र सम्बन्धित निकायले अवस्था मूल्यांकन गर्दै आवश्यक उपकरणसहित उद्धार र मरम्मतको तयारी गरिरहेका छन्।