नेपाल टेलिकमको नेटवर्कमा प्राविधिक समस्या 

 सरकारी स्वामित्वको दूरसञ्चार सेवा प्रदायक नेपाल टेलिकमको नेटवर्कमा पछिल्ला दुई दिनदेखि समस्या आइरहेको छ। सोमबारदेखि पटक–पटक सेवा अवरुद्ध हुँदा फोन नलाग्ने, इन्टरनेट स्लो हुने तथा अन्य सेवाहरू प्रभावित भएका छन्।

टेलिकमका प्रवक्ता रविन्द्र मानन्धरका अनुसार सोमबार दुई पटक र मंगलबार पनि दुई पटक नेटवर्कमा समस्या देखिएको हो। उक्त समस्या अनलाइन चार्जिङ बिलिङ (OCS) प्रणालीको इन्टरफेस युनिटमा आएको प्राविधिक खराबीका कारण देखिएको उनले जानकारी दिए।

“प्राविधिक विषय भएकाले समस्या के–कारणले आयो भनेर हामी डाइग्नोसिस गरिरहेका छौं, अहिले चाहिँ सिस्टम चलिरहेको छ,” प्रवक्ता मानन्धरले बताए।

यता, टेलिकमकी प्रबन्ध निर्देशक संगीता पहाडी अर्यालसहितका उच्च अधिकारीहरूमाथि अख्तियार दुरुपयोग अनुसन्धान आयोगले मुद्दा दायर गरेपछि एकाएक नेटवर्क अवरुद्ध हुनुले कतिपयले शंका व्यक्त गरिरहेका छन्। तर, प्रवक्ता मानन्धरले यो केवल संयोग मात्र भएको भन्दै त्यससँग कुनै सम्बन्ध नरहेको स्पष्ट पारेका छन्।

टेलिकमले समस्या समाधानका लागि प्रविधिक टोलीलाई परिचालन गरेको र छिट्टै सेवा सुचारु हुने जनाएको छ। यसबीच सेवाग्राहीहरू भने निरन्तर अवरुद्ध सेवाबाट हैरान भएका छन्।