सुर्खेत प्रदेश अस्पतालका लेखा अधिकृतसहित तीन जनाविरुद्ध भ्रष्टाचारकाे मुद्दा दायर

सुर्खेत । अख्तियार दुरुपयोग अनुसन्धान आयोगले सुर्खेतस्थित प्रदेश अस्पतालका लेखा अधिकृतसहित तीन जनाविरुद्ध भ्रष्टाचारको मुद्दा दायर गरेको छ। अस्पतालको बिलिङबाट संकलन भएको लाखौं रुपैयाँ बैंकमा दाखिला नगरी हिनामिना गरेको आरोपमा आयोगले आज विशेष अदालत, काठमाडौंमा मुद्दा दर्ता गराएको हो।

आयोगका अनुसार, मुद्दा दायर गरिएकाहरूमा प्रदेश अस्पताल, सुर्खेतका लेखा अधिकृत शंकरप्रसाद सुवेदी, करारमा कार्यरत बिलिङ कर्मचारी तृप्ती शाही ठकुरी र अस्पताल परिसरमा रहेको कुमारी बैंकको एक्स्टेन्सन काउन्टरकी तत्कालीन इञ्चार्ज गोमा सिँजाली मगर रहेका छन्।

आयोगका प्रवक्ता राजेन्द्रकुमार पौडेलका अनुसार, उनीहरूले मिलेमतोमा अस्पतालको बिलिङ काउन्टरमा संकलित रकम बैंकमा दाखिला नगरी व्यक्तिगत फाइदाका लागि हिनामिना गरेको अनुसन्धानबाट खुलेको हो। तीनै जनाविरुद्ध २५ लाख ६७ हजार ५२६ रुपैयाँ बिगो कायम गरी मुद्दा दायर गरिएको प्रवक्ता पौडेलले जानकारी दिनुभयो।

आयोगले भ्रष्टाचार निवारण ऐन, २०५९ बमोजिम कसुर गरेको ठहर गर्दै बिगो असुलउपर गरी कानूनबमोजिम कैद र जरिवानाको सजाय मागदाबी गरेको छ। सार्वजनिक पदको दुरुपयोग गरी सरकारी सम्पत्ति हिनामिना गरेको यस प्रकरणले सार्वजनिक संस्थाभित्रको आर्थिक अनुशासन र पारदर्शितामाथि गम्भीर प्रश्न खडा गरेको छ।